अमेरिका जादा अबदेखि कोरोना नेगेटिभ रिपोर्ट देखाउन नपर्ने
एजेन्सी, २८ जेठ । अमेरिकामा विदेशबाट आएका यात्रुहरूलाई कोरोना नभएको रिपोर्ट देखाउन नपर्ने भएको छ ।
अमेरिकी सरकारले कोरोना महामारीको जोखिम कम भएको र सबैको पहुँचमा खोप पुगिसकेकाले अबदेखि कोरोना नभएको रिपोर्ट देखाउन नपर्ने व्यवस्था गर्न लागेको हो ।
अमेरिकाले कोरोना भाइरसविरुद्धको लडाईंमा उल्लेखनीय प्रगति हासिल गरेकाले अमेरिका पुग्ने हवाई यात्रुहरूले अबदेखि कोरोना नेगेटिभ प्रमाण पेस गर्नुपर्ने नियम हटाइएको बताइएको छ ।
यो नियम भोलिदेखि लागू हुनेछ ।
अमेरिकाको भ्रमण उद्योगले यो नीतिको अन्त्यका लागि सरकारमाथि निरन्तर दबाब दिँदै आएको थियो ।
भ्रमण व्यवसायीहरूले यस नीतिका कारण परिवारहरू विदेशमा अलपत्र पर्ने डरले हवाई टिकट बुकिङ गर्न मानिस डराउने गरेको समस्या स्पष्ट पारेका थिए ।
अमेरिकाको रोग नियन्त्रण तथा रोकथाम केन्द्र (सीडीसी) ले नयाँ नीतिको आगामी ९० दिनसम्म पुनर्मूल्याङ्कन गर्ने बताएको छ ।
अमेरिकाले कोरोना महामारीका कारण विश्वमै सबैभन्दा बढी मानवीय क्षति बेहोरेको छ ।
