ढाका (बङ्गलादेश), २७ मङ्सिर । बङ्गलादेशस्थित रोहिङ्ग्या शरणार्थी शिविरमा सरकारले व्यापक खोप अभियान सञ्चालन गरेको छ । 

शिविरमा शङ्कास्पद भ्यागुते रोगबाट नौ जनाको मृत्यु भएको र ७ सय भन्दा बढी व्यक्तिमा सङ्क्रमण भेटिएपछि बङ्गलादेश सरकारले मङ्गलबारदेखि उक्त अभियान सुरु गरेको हो । 

बङ्गलादेशका स्वास्थ्य अधिकारीहरूले दक्षिणी बङ्गलादेशमा रहेको रोहिङ्ग्या शरणार्थी शिविरमा भ्यागुते रोगको प्रकोप फैलिएकोबारे अनभिज्ञता प्रकट गरेका छन् । 

म्यानमारमा जातिय हिंसा चर्किएपछि केही महिना पहिले भागेर बङ्गलादेश पुगेका ६ लाख ४६ हजार रोहिङ्ग्याहरू रहेका शिविरमा भ्यागुते रोगको सङ्क्रमण भेटिएको हो । 

“अहिलेसम्म नौजनाको भ्यागुते रोगको प्रकोपका कारण मृत्यु भएको हुनसक्ने देखिएको छ,” बङ्गलादेशको सरुवा रोग तथा महामारी नियन्त्रण शाखाका प्रमुख मिर्जा्दि सब्रिना फ्लोराले बताए । 

सङ्क्रमण देखिएका ७ सय मध्ये अधिकांश बालबालिकासहित १ सय ४ जनामा विगत २४ घण्टाभित्र रोगको सङ्क्रमण देखिएको बङ्गलादेशको स्वास्थ्य सेवा विभागले जनाएको छ । 

अधिकारीले शरणार्थी शिविरमा भीड भएका स्थानमा दुई छुट्टै एकाई बनाई प्रयाप्त बास र खाना साथसाथै औषधोपचारको पहँुच नपुग्ने रोहिङ्ग्या शरणार्थीलाई सेवा प्रवाह गर्ने बताएका छन् । 

खोपका कारण पछिल्ला केही दशक यता भ्यागुते रोगका विरामी लगभग उन्मुलनको दिशामा पुगेको बताउने गरिन्छ । यस रोगका कारण श्वासप्रश्वासमा सङ्क्रमण हुने र समयमा उपचार सेवा नलिएमा यसले ज्यानै लिने खतरा हुन्छ । 

सरकार र राष्ट्रसङ्घीय निकायको संयुक्त पहलमा सातबर्ष मूनिका दुई लाख ५० हजार शरणार्थी बालबालिकालाई खोप दिने तयारी थालिएको छ ।

रासस
 

Hamro Doctor