भारतमा आजबाट १५ देखि १८ वर्ष पुगेका बालबालिकालाई कोरोनाविरुद्धको खोप लगाइँदै
भारत, १९ पुस । भारतमा आजबाट १५ देखि १८ वर्ष पुगेका बालबालिकालाई कोरोनाविरुद्धको खोप लगाइँदै छ ।
भारत सरकारले कोरोना महामारीको तेस्रो चरणको लहरका कारण उच्च जोखिममा बालबालिका रहेकाले आजबाट १५ देखि १८ वर्ष पुगेका बालबालिकालाई कोरोनाविरुद्धको खोप लगाउने भएको हो ।
भारत सरकारले बालबालिकाका लागि भारत बायोटेक कम्पनीले बनाएको कोभ्याक्सिन खोपलाई मान्यता दिएको छ ।
भारत बायोटेकले बालबालिकामा कोभ्याक्सिन निकै नै प्रभावकारी देखिएको र विभिन्न चरणको परीक्षण पछि सरकारसँग प्रयोगका लागि अनुमति पाएको हो ।
भ्याक्सिन लगाउनका लागि १ जनवरीदेखि नै रजिस्ट्रेशन सुरु भएको थियो ।
भारत सरकारले खोप लगाउनु अघि बालबालिकाको भाइटल टेस्ट गर्ने भएको छ । बालबालिकाको उचाइँ र स्वास्थ्य अवस्थालाई हेरेर मात्रै खोप लगाइने भारत सरकारले जनाएको छ ।
भारतमा पछिल्लो समय कोरोना सङ्क्रमणको दर फेरि बढ्न थालेको छ । कोरोना महामारीको तेस्रो चरणको लहरको सङ्केत देखिन थालेपछि बालबालिकालाई ध्यानमा राखी खोप अभियान सुरु हुन लागेको हो ।
गत २४ घन्टामा मात्रै भारतमा ३२ हजारभन्दा बढीमा कोरोना सङ्क्रमण पुष्टि भएको छ । भारतको विभिन्न राज्यमा कोरोनाको ओमिक्रोनले समुदायस्तरमै सङ्क्रमण फैलिएपछि जोखिम बढेको हो ।
