भारतमा ओमिक्रोनका कारण चिन्ता बढ्दै, २० राज्यमा फैलियो
एजेन्सी, ४ पुस । भारतको २० राज्यमा कोरोना नयाँ स्वरुप ओमिक्रोन फैलिएको छ ।
पछिल्लो समय दैनिक १५ देखि २० जनाका दरले भारतमा ओमिक्रोनका नयाँ सङ्क्रमित फेला पर्न थालेका छन् ।
भारतको स्वास्थ्य तथा परिवार कल्याण मन्त्रालयका अनुसार ओमिक्रोन पुष्टि भएसँगै भारतका विभिन्न राज्यमा नयाँ ओमिक्रोन सङ्क्रमित फेला पर्न थालेका छन् ।
शनिवार मात्रै महाराष्ट्रको एक विद्यालयमा १६ जना बालबालिकामा ओमिक्रोन पुष्टि भएको मन्त्रालयले जनाएको छ ।
यस्तै लखनउमा पनि ओमिक्रोनको आशङ्कामा १२ जनाको स्वाब जीन सिक्वेन्सिङ्गका लागि पठाइएको छ ।
सबैभन्दा पहिले कर्नाटकमा पुष्टि भएको ओमिक्रोन महाराष्ट्र, राजधानी दिल्ली, राजस्थान, गुजरात, पञ्जाब लगायत २० राज्यमा फैलिसकेको छ ।
सबैभन्दा बढी महाराष्ट्रमा ४८ जनामा ओमिक्रोन फेला परेको छ भने देशभर ओमिक्रोनका कारण सङ्क्रमित हुनेको सङ्ख्या १ सय ३४ पुगेको छ ।
देशभर ओमिक्रोनका कारण मानिसहरू सङ्क्रमित हुने क्रम बढेपछि भारत सरकारले कडाई गर्न थालेको छ । इसाई धर्माबलम्बीहरूको पर्व क्रिसमसलाई ध्यानमा राखेर भारत सरकारले नयाँ प्रतिबन्ध जारी गरेको छ ।
मुलुकमा ओमिक्रोनको जोखिम रहेकाले सकेसम्म घरभित्रै र भिडभाड नभएको स्थानमा पर्व मनाउन आग्रह गरेको छ भने यात्रामा पनि कडाई गरिएको छ ।
यसैबीच, ओमिक्रोनका कारण निम्तिन सक्ने जोखिमलाई ध्यानमा राखी विभिन्न सहरमा अस्थायी अस्पताल निर्माण र आवश्यक तयारी सुरु भएको छ ।
