बेलायतमा आजदेखि कोरोनाविरुद्धको बुस्टर खोपका लागि नाम दर्ता गर्न सकिने
एजेन्सी, २७ मंसिर । आजदेखि बेलायतमा भने कोरोना भाइरसविरुद्धको बुस्टर खोपका लागि नाम दर्ता खुल्ला गर्ने तयारी भएको छ ।
आजदेखि ३० वर्ष उमेरभन्दा माथिका व्यक्तिलाई बुस्टर खोपका लागि नाम दर्ता खुल्ला गर्ने तयारी भएको बीबीसीले जनाएको छ । त्यहाँ कोरोनाको दोस्रो मात्रा लगाएको तीन महिनामा बुस्टर खोप दिने योजना रहेको स्वास्थ्य तथा सामाजिक हेरचाह सचिव साजित जाबिदले बताए ।
यसअघि दोस्रो मात्रा लगाएको ६ महिनापछि मात्रै बुस्टर दिने योजना थियो । कोरोनाविरुद्धको बुस्टर खोपले ओमिक्रोनसँग लड्न सहयोग गर्ने उनको विश्वास छ ।
बेलायतमा कोरोनाको नयाँ उत्परिवर्तित स्वरुप ओमिक्रोनका कारण बिरामीहरू अस्पताल भर्ना हुन थालेका छन् ।
बेलायतका शिक्षा मन्त्री नदीम जहावीले राजधानी लण्डनमा पछिल्लो केहि दिनदेखि ओमिक्रोनका कारण सङ्क्रमित भएका बिरामीहरू अस्पताल भर्ना हुने क्रम बढेको बताए ।
उनले ओमिक्रोनका कारण हालसम्म कसैको पनि मृत्यु नभएको तर, अस्पताल भर्ना हुने बिरामीको सङ्ख्यामा वृद्धि भएको जानकारी दिए ।
साथै उनले कोरोनाको दुई मात्रा खोप लगाइसकेकालाई बुस्टर मात्रा लगाउन पनि आग्रह गरे ।
