भारतमा दैनिक संक्रमितको संख्यामा फेरि वृद्धि
एजेन्सी, १८ भदौ । भारतमा कोरोनाभाइरसबाट नयाँ सङ्क्रमितको सङ्ख्यामा फेरि वृद्धि भएको छ। अधिकारीले बिहीबार विहान दिएको जानकारीअनुसार भारतमा पछिल्लो २४ घण्टामा ४७ हजार ९२ जना नयाँ सङ्क्रमित थपिएका हुन्। केन्द्रीय स्वास्थ्य मन्त्रालयले सोही अवधिमा ३५ हजार १ सय ८१ जना सङ्क्रमणमुक्त भएको जानकारी दिएको छ।
एउटै समयमा नयाँ सङ्क्रमितको सङ्ख्याभन्दा सङ्क्रमणमुक्त भएकाको सङ्ख्या थोरै भएकाले सक्रिय सङ्क्रमितको सङ्ख्यासमेतमा वृद्धि भएको छ। भारतमा अहिले सक्रिय सङ्क्रमितको सङ्ख्या तीन लाख ८९ हजार ५ सय ८३ रहेको मन्त्रालयले जनाएको छ।
मन्त्रालयका अनुसार भारतमा अहिलेसम्म तीन करोड २० लाख २८ हजार ८ सय २५ जना कोरोनाभाइरसबाट सङ्क्रमणमुक्त भएका छन्। भारतमा पछिल्लो २४ घण्टामा ५ सय ९ जनाको मृत्यु भएको छ भने अहिलेसम्म कुल मृतकको सङ्ख्या चार लाख ३९ हजार ५२९ पुगेको छ। मृतकमध्ये १ सय ७३ जनाको केरला प्रदेशमा मात्रै मृत्यु भएको हो। केरलामा सङ्क्रमित भएकाको सङ्ख्या ३२ हजार ८ सय २ रहेको छ।
