भारतीय स्वरुपको कोरोना भाइरस चीनमा पनि पुष्टि, हाईअलर्ट जारी
बीबीसी, १८ वैशाख । चीनमा पनि कोरोना भाइरसको भारतीय भेरिएन्ट फेला परेको दावी गरिएको छ ।
चीनियाँ अधिकारीहरुले कोरोना भाइरसको बी १६१७ भेरिएन्ट पुष्टि भएको दावी गरेका छन् । कोरोनाको भारतीय भेरिएन्ट फेला परेपछि चीनमा हाईअलर्ट जारी गरिएको छ ।
कोरोना भाइरसको यो भेरिएन्ट सबैभन्दा पहिले भारतमा भेटिएकोले यसलाई भारतीय भेरिएन्ट पनि भन्ने गरिन्छ । भारतमा भेटिएको यो भेरिएन्टको विषयमा हालसम्म वैज्ञानिकले कुनै ठोस तथ्य फेला पारेको छैन ।
चीनिया सेन्टर फर डिजीज कन्ट्रोल एन्ड प्रिभेन्शन (सीडीसी) का प्रमुख वू जुनयूले चीनमा नयाँ भेरिएन्ट फेला परेको पुष्टि गरेका हुन् । उनले कोरोनाको यो भेरिएन्ट हालसम्म चीनका कति जनामा कोरोनाको भेरिएन्ट पुष्टि भएको छ भन्ने विषयमा भने खुलाएनन् ।
उनले चीनका केही शहरमा भारतको म्यूटेट स्ट्रेन भेटिनु चिन्ताको विषय रहेको र विभिन्न शहरमा यो भेरिएन्ट फेला परेको बताए ।
कोरोनाको न्यू भेरिएन्टले फेरी एक पटक महामारीको चेतावनी दिएको भन्दै उनले सबै तयारीका लागि जुट्न आग्रह गरे ।
