विश्व स्वास्थ्य संगठनको टोली कोरोना भाइरसको उत्पत्तिबारे जान्न वुहान जादै
बीबीसी, २ पुस । विश्व स्वास्थ्य संगठन (डब्लूएचओ)को टोली चीनको वुहान जाने भएको छ । कोरोना भाइरस सङक्रमणको सुरुवातबारे जान्नका लागि डब्लूएचओको टोली चीनको वुहान जान लागेको हो ।
अर्काे महिनामा १० जना वैज्ञानिकको टोली वुहान जाने बीबीसीले जनाएको छ । वुहानमा कोरोना भाइरस उत्पत्तिबारे अध्ययनका लागि संगठन र चीन बीच धेरै पहिलादेखि कुराकानी हुँदै आएको थियो ।
कोरोना भाइरस सङक्रमणको सुरुवात वुहान शहरबाट भएको मानिन्छ । तर कोरोना भाइरसको सुरुवातलाई लिएर अमेरिका र चीनबीच विवाद भएको थियो ।
अमेरिकी राष्ट्रपति डोनाल्ड ट्रम्पले चीनले महामारी फैलिएकोबारे जानकारी नदिने कोशिश गरेको आरोप लगाउनुभएको थियो । दोषी खोज्नका लागि नभई कोरोना भाइरस सङक्रमणको सुरुवातमा के भएको थियो ? कसरी फैलिएको थियो भन्ने पत्ता लगाएर भविष्यमा खतरा कम गर्ने वैज्ञानिकको टोलीले बताएको उल्लेख छ । डब्लूएचओको टोली चारदेखि पाँच हप्तासम्म वुहानमा रहने बीबीसीले जनाएको छ ।
