गुल्मी, ११ असार । दोश्रो चरणको स्थानीय तह निर्वाचनको शुन्य अवधि सुरु हुँदै गर्दा गुल्मी चारपाला –४ का भुपेन्द्र कँडेललाई भोट मागेर भ्यानभ्याई छ । स्थानीय स्तरमा लगनशिल स्वास्थ्यकर्मीका मानिने कँडेल सिएमए पासभएदेखि राजनीति र स्वास्थ्यकर्म दुबै गरिरहेका छन् ।

अरु बेलामा घाँटीमा स्टेस्थेस्कोपी र औषधि बोकेर गाउँ डुल्ने कँडेल अहिले खादा र नेपाली काँग्रेसको झण्डा भिरेर गाउँ डुल्दै छन् । कँडेल असार १४ गते हुन गइरहेको दोस्रो चरणको स्थानिय तह निर्वाचनमा गुल्मीको दरबार गाँउपालीका वडा नम्वर ४ बाट वडा अध्यक्ष पदमा चुनावी मैदानमा  छन् । 

तम्घास टेक्निकल इन्सिट्युटबाट सिएमएमा टपर बनेका उनी सोहि इन्सिट्युटमा अध्यापन गर्दैगर्दादेखि राजनीतिमा सक्रिय भएका हुन् । स्थानीयस्तरमा कल्याण फर्मा र मेडिकल चलाएर बसेका उनी जनताको चाहनामै उम्मेदवार बनेको स्थानीय लोकेन्द्र रजाली दावी गर्छन् । उनी भन्छन् ‘गाउँमा कोही बिरामी भए पहिले खबर उनलाई नै गर्ने धेरै छन् । बिरामीको सेवा मात्र होइन । स्थानीय स्तरका विभिन्न विकास निर्माणमा उनको योगदानलाई कदर गर्दै हामीले उठ्न भनेका हौं ।’ 

उम्मेद्वार कँडेलल भन्छन्ः ‘म अरुलाई नै सहयागे गर्न चाहान्थें । म त क्लिनिक चलाएर गाउँलेको सेवा गर्न बसेको मान्छे हो । तर, गाउँलेको आग्रहले नै म चुनावमा उठेको हुँ । म राजनीतिबाट पनि जनताको सेवा गर्न चाहान्छु ।’ त्यसो त कंडेल राजनीतिक पृष्ठभूमिकै व्यक्ति हुन् । पञ्चालयतदेखि बहुदलसम्मको पुर्खौली राजनीतिमा पछ्याइरहेका उनी स्वास्थ्यकर्मी सँगै तरुणदल चारलापाका अध्यक्ष पनि हुन् ।  

गाउँमा कोही बिरामी परे जिल्ला सदरमुकाम तम्घास या पाल्पाको नानसेन लैजानु पर्ने गाउँलेको बाध्यतालाई चिर्दै गाउँमै सुविधासम्पन्न स्वास्थ्य सेवा उपलब्ध गराउने पनि कंडेलले आफ्नो योजनामा राखेको बताएका छन् । 

Hamro Doctor