इटहरी, २७ जेठ । नेपाल सरकारको पछिल्लो स्वास्थ्य सुधार नीतिअन्तर्गत सुनसरी जिल्लाको सदरमुकाम इनरुवामा रहेको जिल्ला अस्पतालले अस्पताल परिसरमा आफ्नै फार्मेसी सञ्चालनमा ल्याएको छ । 

निवर्तमान स्वास्थ्य मन्त्री गगनकुमार थापाको पहलमा सुरु भएको सरकारी अस्पतालमा आफ्नै फार्मेसी संचालन गर्ने नीतिअनुसार जिल्ला अस्पताल सुनसरीले हिजो देखि आफ्नै फार्मेसी सुरु गरेको हो । 

पाँच लाख रुपैयाको औषधि खरिद गरेर अस्पतालले सञ्चालनमा ल्याएको फार्मेसी सेवाको सुनसरीका प्रमुख जिल्ला अधिकारी गोपालप्रसाद पराजुलीले शुभारम्भ गरे ।

सरकारले तोकेको निःशल्क औषधिबाहेक चिकित्सकले सिफारिस गरेका औषधि अस्पताल परिसरमा नै बिरामीका आफन्तले सहजरुपमा खरिद गर्न सक्नेगरी फार्मेसी सञ्चालनमा ल्याएको जिल्ला जनस्वास्थ्य प्रमुख मुकुन्दराज गौतमले जानकारी दिए । 

अस्पताल विकास समितिका अध्यक्ष रमेश कट्वालले अस्पतालमा आउने सेवाग्राहीको आवश्यकता र चिकित्सकको सिफारिसका आधारमा औषधि थप्दै जाने अस्पतालको नीति रहेको जानकारी दिए ।
 

Hamro Doctor