खार्तुम (सुडान), २० जेठ । सुडानमा गत अगस्त महिनादेखि अहिलेसम्म झाडापखालाका कारण २ सय ६५ जनाको मृत्यु भएको जनाइएको छ । 

सुडानी स्वास्थ्यमन्त्री बहार इद्रिस् अबु गरादाले देशका ११ वटा राज्यमा पछिल्लो १० महिनाको अवधिमा झाडापखालाबाट १६ हजार १ सय २१ व्यक्ति प्रभावित भएकोे बताए । 

उनले दूषित पानीबाट हुने झाडापखालाका बिरामीहरु बढ्ने चेतावनी दिँदै वर्षात्को बेला झाडापखालाका बिरामीहरुको सङ्ख्या अझ बढ्ने बताए । 

मन्त्रीको प्रतिवेदनका अनुसार सुडानको ह्वाइट नाइल राज्यमा सबैभन्दा बढी चार हजार ५१२ जना बिरामी भएको तथ्याङ्क पाइएको छ । 

त्यसैगरी ब्लु नाइल राज्य दोस्रो स्थानमा परेको छ । त्यहाँ चार हजार ४ सय ७१ जनामा झाडापखालाको प्रकोप देखिएको छ भने १२ जनाको मृत्यु भएको छ । तेस्रो स्थानमा परेको सिनार राज्यमा दुई हजार ४०१ जना प्रभावित भएको र १४ जनाको मृत्यु भएको प्रतिवेदनमा उल्लेख छ । 

खार्तुम राज्यमा १० महिनाको अवधिमा १९ जनाको मृत्यु भएको र ८ सय ७८ जना प्रभावित भएका छन् । 

रेड सि प्रदेशमा एक हजार १३७ जना प्रभावित भएको र १९ जनाको मृत्यु भएका बेला गेजिरामा ५५ जनाको मृत्यु र ९८२ जना प्रभावित भएका छन् । 

मन्त्रीले पानीका स्रोतहरुको अवलोकन गरी सफा बनाउनेतर्फ लाग्नुपर्नेमा पनि जोड दिए । रासस
 

Hamro Doctor