झापा, २३ चैत । मंगलबार दिउसो दुई बजेको समयमा झापामा अवस्थित मेची अञ्चल अस्पताल पुग्दा माहोल अस्पतालको जस्तो लाग्दैनथियो । वातावरण शान्त र सुनसान थियो । साह्रो गर्मी पनि नचढिसकेको हुँदा अपरान्हको हावा त्यति गरम थिएन । एकसय ५० शैयाको भव्य अस्पतालभित्र छिर्दा बाटोमा केही बिरामी तीनका निराशजस्ता देखिन आफन्त, एकजना मेडिकल अफिसर, केही नर्सिङ स्टाफ र केही प्रशासनिक कर्मचारीमात्र भेटिए । 

वार्डमा बिरामीको उपचार भैरहेको थियो भने ओपिडी सेवा बन्द भैसकेको थियो । स्वास्थ्य मन्त्रालयले ओपिडी समय विस्तार गरेर ९ देखि ५ बनाउने भनेपनि त्यो रामशाहपथमै सीमित छ । मेची भद्रपुरको अञ्चल अस्पतालमा त्यसको कुनै छनक देखिएको थिएन । ‘यहाँ त बाह्रबजेसम्ममात्र हो । त्यसपछि त बिरामी नै आउँदैनन् । बिरामी जति सबै प्राइभेटमा जान्छन्, डा. साबहरु पनि त्यतै ।’ बन्द भैसकेको टिकट काउन्टर रुंगेर बसेका एकजना कर्मचारी बोले । 

अस्पताल छिरेर धेरैबेरसम्म तलमाथि गर्दा समेत एकजनापनि चिकित्सक नभेटेपछिमात्र प्रशासनिक भवन जाँदै गर्दा एकजना कर्मचारीले भने ‘मेसू ज्यू त बिर्तामोडको आफ्नै क्लिनिकमा हुनुहुन्छ । २ बजेपछि त यहाँ भेटिनुहुन्न ।’ बिरामी सम्झेर बकेका उनले हातको क्यामरा देखिँदासाथ मेसुले कुन क्लिनिकमा काम गर्ने गरेको भन्ने आफुलाई थाहा नभएको भन्दै पाखा लागे । 

दरबन्दीमात्र भरिभराऊ चिकित्सक नै छैनन्

अस्पतालभित्र २ बज्दा नबज्दै एक्सेर, भिडियो एक्सरे, इसिजी, अल्ट्रासाउण्ड जस्तो सबै सामान्य सेवा बन्द भैसकेका थिए । नहोस् पनि कसरी मेची अञ्चल अस्पतालमा स्विकृत दरबन्दी अनुसार २६ जना डाक्टर हुनुपर्ने हो । तर, जम्मा ९ जना डाक्टर उपलब्ध छन् अस्पतालमा । समग्र कर्मचारी र चिकित्सकको कुरा गर्ने हो भने अस्पतालमा १ सय ३ जनाको दरबन्दी हो । जसमध्ये ५८ जनामात्र उपलब्ध छन् । बाँकी ४६ वटा पदमा कर्मचारी रिक्त छन् । केन्द्रसँग पटकपटक माग गर्दापनि चिकित्सक व्यवस्था नभएको प्रशासनका कर्मचारीले बताए । अस्पतालमा अतिआवश्यक एनेस्थेसियाको डाक्टर नहुँदा कुनैपनि मेजर शल्यक्रिया हुनसक्दैन । जसले गर्दा अस्पताल अञ्चलस्तरीय भन्नपनि लाजमर्दो छ । 

मेसूको आफ्नै क्लिनिक, मेचीका डाक्टरलाई बेच्दै प्राइभेट धन्दा 

२ बज्दा नबज्दै अञ्चल अस्पतालमा किन सन्नाटा छायो भनेर बुझ्दै जाँदा थाहा भयो, अस्पतालका चिकित्सकलाई सरकारीमा भन्दा निजीतिर बढी प्रेम रहेछ । जुनकुरा अस्पतालको प्रांगण बाहिर लस्करै झुण्ड्याएका प्राइभेट साइनबोर्ड देख्दापनि थाहा हुन्थ्यो । एकजना कर्मचारीले नाम गोप्य राख्न आग्रह गर्दै भने ‘डा. सावको त विर्तामोडमा आफ्नै क्लिनिक छ । एकदम हिट क्लिनिक । उतै जानुभयो की, हुन त उहाँले हेर्ने क्लिनिक यता बाहिर पनि छ । यतै पो हुनुहुन्छ की !’ 

अस्पतालका मेसू जनरल फिजिसियन डा. पिताम्बर ठाकुर २ बज्दासाथ बिर्तामोड पुग्दा रहेछन् । त्यसो त उनी अस्पतालै बाहिर रहेको क्लिनिकमा पनि काम गर्छन । उनको नाम झुण्ड्याएर अस्पताल बाहिरै बिरामी रोकिन्छन् । त्यस्तै अर्का बालरोग विशेषज्ञ डा. टंकप्रसाद बराकोटीको पनि आफ्नै क्लिनिक छ । त्यो पनि अस्पताल बाहिरै । विचरा उनले त अलियताको ओम साइपाथिभरा अस्पतालपनि धानिदिएका छन् । उनीमात्र होइन ।

अस्पताल बाहिर मेची अस्पतालका डाक्टर भन्ने नाम बिकाएर रेडियोलोजिष्ट जुनकुमार श्रेष्ठ, सञ्जयकुमार गुप्ता, स्त्री तथा प्रसूतिरोग विशेषज्ञ डा. दिलीपकुमार साह,  सबैको आआफ्नै क्लिनिक छ । अझै अर्का फिजिसियन डा.गोविन्द कंडेलले त अस्पताल गेटकै सामुन्ने आफ्नो क्लिनिक ठड्याएका छन् । मानौं उनकोमा परामर्श लिएरमात्र अञ्चल अस्पतालमा जानुपर्ने झैं । 

Hamro Doctor