बाबियाचौर (म्याग्दी), २२ मङ्सिर । म्याग्दीकी एकजना मिर्गाैला रोगीको उपचारका लागि बेलायतबाट करिब दुई लाख रुपैयाँ आर्थिक सहयोग प्राप्त भएको छ । ताकम–४ की २७ वर्षीया इन्द्रा खत्रीको उपचारका लागि म्याग्दी प्रवासी नेपाली सङ्घ (मोना) बेलायतले एक लाख ९५ हजार ७७५ रुपैयाँ सहयोग गरेको हो । 

ओमकुमारी शान्ति कोषले मङ्गलबार बेनीमा आयोजना गरेको कार्यक्रममा मोनाका संरक्षक सुवास श्रेष्ठले कोषका अध्यक्ष राजेश शाक्यमार्फत खत्रीका बुबा हेमबहादुरलाई सो रकम हस्तान्तरण गरेका हुन् । 
बेनी नयरपालिका–५ माइत भएकी खत्रीका परिवारको कमजोर आर्थिक अवस्थाका कारण उपचारमा समस्या भएपछि कोषले सहयोग सङ्कलन अभियान सञ्चालन गरेको छ ।

शिक्षण अस्पताल काठमाडाँैमा उपचार गराइरहेकी खत्रीका लागि हालसम्म पाँच लाख ३६ हजार ७७५ रुपैयाँ सहयोग जुटेको कोषका सचिव लोकेश पुन मगरले जानकारी दिए । 

बेलायत, अस्टे«लिया, न्युजिल्याण्ड, कतार लगायतका देशमा रहेका म्याग्देलीको पहलमा सो सहयोग प्राप्त भएको हो ।

हाल डायलाइसिस गराइरहेकी खत्रीको मिर्गौला प्रत्यारोपणका लागि १२ लाख रुपैयाँ आवश्यक पर्ने चिकित्सकले बताएका छन् । खेती किसानी गर्दै आएकी खत्रीको परिवारमा श्रीमान् र एक छोरा छन् । श्रीमान् र अभिभावकले सहयोगका लागि अपिल गरेका छन् । रासस 
 

Hamro Doctor