काठमाण्डौ, २० मंसिर । पूर्व उपप्रधानमन्त्री एवं नेपाली काँग्रेसकी नेतृ सुजाता कोइराला स्तन क्यान्सरको शल्यक्रिया सकेर नेपाल फर्किएकी छिन् । 
उनको सिंगापुरको सेन्ट थोमस अस्पतालमा केहीदिन पहिले शल्यक्रिया सम्पन्न भएको हो । स्तन क्यान्सरको उपचारका क्रममा उनको पाठेघरमा पनि क्यान्सर भएको पाइएपछि पाठेघरको पनि शल्यक्रिया गरिएको छ । पाठेघरको क्यान्सरको शल्यक्रिया भने मलेसियाको सन वे अस्पतालमा गरिएको हो । दुवै शल्यक्रिया सम्पन्न गरी २३ दिनपछि नेतृ कोइराला आइतबार नेपाल फर्किएकी हुन् ।

कोइरालाको दुवै शल्यक्रिया सम्पन्न भएपछि उनी खतरामुक्त भएको चिकित्सकले बताएको उनी निकट स्रोतले जनाएको छ । चिकित्सकको सल्लाह बमोजिम कोइरालाले केही समय घरमै आराम गर्ने जनाइएको छ । उनलाई दुईमहिना पछि फलोअपका लागि बोलाइएको उनका स्वकीय सचिव लक्ष्मण थपलियाले हाम्रो डक्टरलाई जानकारी दिए । उनको उपचारमा कति खर्च लाग्यो भन्ने बारेमा खुलाइएको छैन । उनलाई क्यान्सर उपचारका लागि सरकारले ५० लाख उपलब्ध गराएको थियो । जसले गर्दा ठूलो विवाद उत्पन्न भएको थियो ।   

Hamro Doctor