काठमाडौँ १६ मंसिर । आज डिसेम्बर १ तारिख अर्थात् २९ औँ विश्व एड्स दिवस नेपाल सहित विश्वभर विभिन्न कार्यक्रम गरी मनाइदैँछ । “एचआईभीलाई रोक्न हात उठाऔँ” मूल नाराका साथ यस वर्षको एड्स दिवस मनाइदैँछ ।

पछिल्लो समय नेपालमा एचआईभी र एड्सको सङ्क्रमण घट्दै गएको छ । एचआईभीको नयाँ सङ्क्रमण ८० प्रतिशतले र एड्सबाट हुने मृत्यु २२ प्रतिशतले घटेको स्वास्थ्य मन्त्रालयको दाबी छ ।  
एचआईभी र एड्स सम्बन्धमा बढ्दो जनचेतनाले गर्दा एड्सप्रति मानिसको धारणा बदलिएको स्वास्थ्य मन्त्रालय सम्बद्ध अधिकारीहरू बताउँछन् ।  

स्वास्थ्य मन्त्रालय राष्ट्रिय एड्स तथा यौनरोग नियन्त्रण केन्द्रका निर्देशक डा. तरुण पौडेलले नेपालमा सन् २०१० को तुलनामा १४६ प्रतिशतले एन्टिरेट्रोभाइरल (एआरभी) औषधिमा पहुँच बढेको जानकारी दिँदै हाल नेपालमा करिब ३९ हजार ३९७ जनामा एचआईभी सङ्क्रमण रहेको अनुमान गरिएको बताए ।  तीमध्ये पुरुष २४ हजार ४४९ र महिला १४ हजार ९४८ छन् ।  उनले,नेपालमा १५ देखि ४९ वर्ष उमेर वर्गमा ०.२ प्रतिशत एचआईभी दर रहेको जानकारी पनि दिए ।  

विश्वमा सन् २००० को तुलनामा ३५ प्रतिशतले एड्सको सङ्क्रमण दर घटेको जानकारी दिँदै डा. पौडेलले बच्चामा हुने सङ्क्रमण दर पनि ५८ प्रतिशतले कम भएको बताए ।  

सन् २००७ मा एचआईभी लाग्नेको सङ्ख्या नेपालमा ७० हजार सात सय थियो भने सन् २००९ सम्ममा उक्त सङ्ख्या ६३ हजार ५२८ मा झरेको छ ।  राष्ट्रिय एड्स तथा यौन रोग नियन्त्रण केन्द्रको तथ्याङ्क अनुसार नेपालमा सन् २००९ सम्ममा दर्ता भएका एड्स रोगीको सङ्ख्या १६ हजार २६२ छ ।

Hamro Doctor