काठमाडौं, ३ मंसिर । स्वास्थ्य मन्त्रालयका दुईवटा अनुगमन टोलीले  शुक्रबार काठमाडौ उपत्यकाका ३२ ओटा निजी स्वास्थ्य संस्थाहरुमा अनुगमन गरेको छ । 
अनुगमन गरिएका मध्ये काठमाडौका पाँचवटा र ललितपुरका दुई वटामा गरी सात वटामा तालाबन्दी गरिएको अनुगमन टोलीहरुले जनाएका छन् । शुक्रवार काठमाडौमा २० ओटा र ललितपुरमा १२ ओटामा अनुगमन गरिएको हो । काठमाडौको कालीमाटी देखि कलंकी सम्म बाटोको छेउमा रहेका क्लिनीकहरु मध्ये सुभारम्भ डेण्टल क्लिनीक, हक मेडिकल हल, स्पार्क पोली क्लिनीक, कालीमाटी डेण्टल क्लिनीक, सिटी भ्याली डेण्टल क्लिनीकमा तालाबन्दी गरिएको हो । 
क्लिनीक संचालनका लागि आधारभूत मापदण्ड समेत पुरा नगरी संचालन गरिएको पाइएकाले तालाबन्दी गराइएको र बाँकी प्रक्रियाका लागि जिल्ला जनस्वास्थ्य कार्यालयमा सम्पर्क गर्न निर्देशन दिइएको अनुगमन टोलीका संयोजक तथा व्यवस्थापन महाशाखाका उपस्वास्थ्य प्रशासक डा रामराज पन्थीले जानकारी दिए । उनले राजभण्डारी डेण्टल क्लिनीक अनुगमन टोली आएको थाहा पाएपछि भागेकोले अर्कोदिन कारवाही गरिने बताए । 
त्यस्तै, अनुगमन तथा मुल्यांकन महाशाखाका उपसचिव भवनाथ खतिवडाको नेतृत्व टोलीले ग्वार्कोमा रहेको कंकाली मेडिकल हल र निरञ्जन डेण्टल क्लिनीक एण्ड ल्यावलाई बन्द गरिदिएको छ । टोलीले ग्लोवल हस्पीटल एण्ड एजुकेशन फाउण्डेसनले गत साउन देखि नविकरण नगरेकाले नविकरणका लागि अल्टीमेटम दिइएको उपसचिव खतिवडाले जानकारी दिए । शुक्रबार सहित पाँच दिनमा काठमाडौ र ललितपुरका ३७ वटा स्वास्थ्य संस्थामा सिल लगाइएको छ ।मन्त्रालयलाई संबन्धीत जिल्ला जनस्वास्थ्य कार्यालयहरुबाट प्राप्त विवरणहरुका अनुसार  काठमाडौमा ४ सय १५ ओटा, ललितपुरमा १ सय ७१ ओटा र भक्तपुरमा २१ ओटा अस्पताल, क्लिनीक र पोलिक्लिनीक दर्ता भएका छन् । 
बिहीबार देखि बाँके, मोरङ्ग लगायतका जिल्लाहरुमा पनि अनुगमन सुरु भएको मन्त्रालयले जनाएको छ । मन्त्रालयले अहिले जारी अनुगमन दुई हप्ता सम्म संचालन गर्ने, उजुरी तथा गुनासोका आधार छड्के जाँच गर्ने, स्थानीय स्तरमा स्वयंसेवक परिचालन गर्ने तयारी पनि गरिरहेको छ । कुनै निजि स्वास्थ्य संस्था स्विकृति र नविकरण नगरी मापदण्ड पुरा नभई सञ्चालन भएको थाहा पाएमा मन्त्रालयको चिकित्सा महाशाखामा उजुरी दिएर सहयोग गर्न मन्त्रालयले सबैलाई आह्वान गरेको छ ।

Hamro Doctor