पर्वत, १८ कात्तिक । मिर्गौलाको रोगबाट पीडित एक युवतीलाई पर्वत जेसिजले आर्थिक सहयोग उपलब्ध गराएको छ । 

जिल्लाको कुश्मा नगरपालिका–४ की २० वर्षीया युवती सङ्गीता बास्तोलालाई पर्वत जेसिजले नगद रु ३५ हजार सहयोग गरेको हो । चितवन मेडिकल कलेजमा फार्मेसी अध्ययनरत युवती बास्तोला २०७२ साउनदेखि मिर्गौलाको रोगबाट ग्रसित बनेकी हुन् । 

आर्थिकरुपमा निम्नवर्गीय परिवारमा जन्मेकी बास्तोलाको उपचारमा सहयोग मिलोस् भन्ने उद्देश्यले जेसिजका पदाधिकारीले आफै रकम सङ्कलन गरेर सहयोग गरेका हुन् । जेसिजको वर्तमान कार्यसमितिमा रहेका पदाधिकारी तथा सदस्य, पूर्वअध्यक्षहरु लेखनाथ शर्मा र बद्रीनारायण शर्माबाट सङ्कलन गरिएको रकम पीडितका बाबु टङ्कनाथ शर्मालाई बुधबार हस्तान्तरण गरिएको हो । 

बास्तोलाको राजधानीमा उपचार भइरहेको छ । चिकित्सकले बाँस्तोलाको मिर्गौला तत्काल प्रत्यारोपण गर्नुपर्ने सल्लाह दिएपछि उनकै बाबु टङ्कनाथले एउटा मिर्गौला दिने तयारीसमेत भइरहेको छ । यसै साता उनको मिर्गौला प्रत्यारोपण गर्ने तयारी भइरहेको छ । 

सामान्य परिवारकी उनको उपचारका लागि लाखौँ रुपैयाँ खर्च लाग्ने भएपछि उपचारका लागि सबै निकायलाई आवश्यक सहयोग गरिदिन पीडितका बाबुले अपिल गरेका छन् । उनको मिर्गौला प्रत्यारोपण गर्न बाबु टङ्कनाथ शर्माले नै आफ्नो मिर्गौला दिने तयारी पनि भएको छ । पेसाले शिक्षक शर्माले छोरीलाई बचाउनका लागि आफैँ मिर्गौला दिने सोच बनाएका छन् । 

रकम हस्तान्तरण कार्यक्रममा जेसिजका अध्यक्ष राजनकुमार जोशीले पीडित युवतीका बाबु टङ्कनाथलाई रकम हस्तान्तरण गरेका थियो । 

अध्यक्ष जोशीको अध्यक्षतामा सम्पन्न कार्यक्रमको संयोजन मुना शर्मा लामिछानेले गरेकी थिइन् । कार्यक्रममा जेसिजका तालिम प्रतिष्ठानका संयोजक लेखनाथ शर्मा, क्लबका अध्यक्ष ठाकुर बी पौडेल लगायतले सम्वोधन गरेका थियो । रासस 

 

Hamro Doctor