काठमाडौं, ९ कार्तिक । केही दिनदेखि काठमाडौँ उपत्यकामा ताजा रगतको अभाव भएपछि रक्तसञ्चार केन्द्र, नेपाल रेडक्रस सोसाइटीले सबैलाई रक्तदान गर्न अपिल गरेको छ ।

दसैँदेखि उपत्यकामा रगत सङ्कलन कार्यक्रम नभएको र रक्तदाताको उपस्थिति कम भएपछि रगतको अभाव हुन थालेको रक्तसञ्चार केन्द्रले जनाएको हो । रगतको अभाव देखिन थालेपछि बिरामी र उनीहरूका आफन्तसमेत समस्यामा परेका छन् ।

केन्द्रका उपनिर्देशक डा.प्रकाश कुमार यादवका अनुसार गत दशैंको पुर्णिमादेखि रगतको अभाव हुन थालेको हो । छठसम्म अभाव कायम रहने  सम्भावना भएकोले सबै रक्तदाताले नजिकको रक्तदान कार्यक्रम तथा रक्तसञ्चार केन्द्रमै आएर रक्तदान गरिदिन समेत उनले आग्रह गरेका छन् ।

रगतको चरम अभाव सिर्जना भएपछि   केन्द्रले व्यक्तिगत सम्पर्कमा रहेका  रक्तदाताहरु र १ हजार रक्त संकलन संस्थाहरुलाई खबर गरि रगत संकलनका लागि आह्वान गरेको यादवले बताए । 

केन्द्रका अनुसार प्लेटलेट्स र पिआरपि संकलनको लागि फ्रेस रगत चाहिने भएकोले समस्या परेको हो । हाल दैनिक अस्पतालबाट माग भएजति रगत संकलन गर्न नसकिएको केन्द्रको भनाई छ ।  

उपनिर्देशक यादवका अनुसार दसैँको फूलपातीसम्म एक हजार २ सय युनिटभन्दा बढी रगत सङ्कलन हुने गरेकोमा अहिले दैनिक ४ सय युनिट पनि सङ्कलन भएको छैन । देशभर रगत पुर्ति गर्ने संस्था एउटै मात्र भएकोले पनि यस्तो समस्या भएको यादबको भनाइ छ । 

स्वयंसेवी रक्तदाता र रक्तदान कार्यक्रम सञ्चालन गर्ने संस्थाले भने रक्तसञ्चार केन्द्रको लापरवाहीका कारण रगत अभाव भएको आरोप लगाउँछन् ।

'ब्लड डोनर्स एसोसिएसन' नेपाल (ब्लोदान) का अध्यक्ष महेन्द्रविलाश जोशीले रक्त सञ्चार केन्द्र, नेपाल रेडक्रस सोसाइटीको व्यबस्थापनको चरम लापरवाहीका कारण बर्षेनि रगत अभाव हुनेगरेको आरोप लगाए ।

केन्द्रले यस्ता कार्यक्रम गर्ने संस्था वा व्यक्तिलाई प्रोत्साहन गर्नुका साटो बेवास्ता गर्ने गरेकाले यो रगत अभावको समस्या दाहोरिने गरेको बताए ।

 जोशीले रेडक्रससँग प्रयाप्त रगत भएको बताउँदै सरकारले यसप्रति चासो नदिए आफुहरुले मात्रै केहि गर्न नसक्ने पनि बताएका छन् । उनले रेडक्रसले एक पोका रगतलाई तीन पोका बनाएर बेच्ने गरेको आरोप पनि लगाएका छन् ।

ब्लोदान अन्तर्गतका भातृसंस्थाहरुमा करिब चार हजारभन्दा बढी स्वयम्सेवी रक्तदाता आबद्ध रहेका छन् ।
 

Hamro Doctor