काठमाडौं, १६ असोज । बालबालिकामा लगाउँदै आइएको इनएक्टीभेटेड पोलियो भ्याक्सिन (आइपीभी) खोप कार्यक्रम एक वर्षका लागि बन्द हुने भएको छ । नेपालमा भ्याक्सिन उपलब्ध गराउदै आएको ग्लोवल एलायन्स फर भ्याक्सिन एण्ड इमुनाइजेसन गाभी नामक अन्तराष्ट्रिय संस्थाले भ्याक्सिन उपलब्ध गराउन नसक्ने भएपछि खोप कार्यक्रम एक वर्षका लागि बन्द हुने भएको हो । संस्थाले सहयोग स्वरुप भ्याक्सिन उपलब्ध गराउँदै आएको थियो ।

बाल स्वास्थ्य महाशाखाले आइतवार पत्रकार सम्मेलन गरी एक वर्षका लागि खोप कार्यक्रम बन्द हुने जानकारी गराएको छ । नेपालमा खोप उपलब्ध गराउँदै आएको उक्त संस्थाले विश्वव्यापी रुपमै खोप अभाव भएको भन्दै तत्काल उपलब्ध गराउन नसक्ने जानकारी गराएको बाल स्वास्थ्य महाशाखाका निर्देशक डा. राजेन्द्र पन्तले बताए । संस्थाले सन् २०१७ सेप्टेम्बरसम्म भ्याक्सिन उपलब्ध गराउन नसक्ने  पत्र मार्फत जानकारी गराएको डा. पन्तले बताए ।

अब महाशाखासँग करीब २ महिनाको लागि पुग्ने मात्र खोप रहेको छ । त्यसपछि करिव १० महिना अभाव रहने छ ।

नेपालमा पोलियो उल्मुलनको तयारीमा रहेपनि खोप अभावले कुनै प्रभाव नपर्ने बताइएको छ । बाल स्वास्थ्य निर्देशक डा पन्तले भने टाइप टु पोलियो विश्वभरमै पूर्णरुपमा उन्मुलन भएका कारण खोप अभावले कुनै प्रभाव पार्दैन  । १७ वर्ष देखि विश्वबाट टाइप टु पोलियो उल्मुलन भएको हुदा केही समय भ्याक्सीन अभाव हुदैमा आत्तिहाल्नु पर्ने अवस्था नरहेको डा. रमेशकान्त अधिकारीले बताए ।

नेपालबाट टाइप टु पोलयो धेरै अघि देखि नदेखिएकाले मुखबाट दिदै आएको पोलियोलाई भ्याक्सिनको रुपमाा मृत जीव मिसिएको आइपिभी भ्याक्सिन दुई वर्षदेखि प्रयोग हुदै आएको थियो । विश्व स्वास्थ्य संगठनको आग्रहमा सो खोप विश्वव्यापी रुपमा सुरु भएको थियो ।

नेपाल सरकारले उपलब्ध गराउदै आएको खोप कार्यक्रमलाई यसले प्रभाव पारेता पनि यदि टाइप टु पोलियोको समस्या देखिएमा स्टकमा रहेको खोप उपलब्ध हुने निर्देशक डा. पन्तले बताए । डा. पन्तले केही समय अभाव हुदैमा यसलाई नकारात्मक रुपम नलिन सबैलाई आग्रह गरेका छन् ।  

खगराज अधिकारी स्वास्थ्यमन्त्री हुँदा दुईवर्षअघि यो खोप कार्यक्रम सुरु गरिएको थियो ।

Hamro Doctor