सत्याग्रही गोविन्द केसीको मुहार आमरण अनशनको दिनगन्ती बढ्दै जाँदा झनै तेजोमय बन्दै गएको देख्दा मनमा ‘सत्य डक्तैन झुठो टिक्दैन’ भन्ने लोकोक्ति याद आएको छ । परिवारवाद, प्रलोभन र पदप्रतिष्ठाको भोकबाट मुक्त डाक्टर केसीको मुहारमा देखिएको जाज्वल्य देख्दा लाग्छ, एउटा सत्य शिखरतर्फ उक्लँदै छ । र, यो शिखरयात्रा दुनियाँलाई असहज र असम्भव लागेपनि यी सत्यवादीलाई भने कुनै कठिन काम लागेको छैन । त्यसैले होला केसीको मुहारमा तेज अझै भरिँदैछ ।

आठौं पटकको अनशनसम्म आइपुग्दा डा. केसीले मुलुकमा जरो गाडेको असत्य, छलछाम र विकृतिको मुटु थर्काएका छन् । र मुटु तिनको पनि थर्किएको छ जो सत्यसँग साक्षात्कार भएर सत्यको ‘स’ समेत उच्चारण गर्ने हिम्मत राख्दैनन् । गोविन्द केसी सत्यको पर्यायवाची हुँदै गर्दा सत्यको मुखुण्डो ओढेर समाजलाई बर्बाद पार्न उद्दत मुहारहरु पनि नांगिदै छन् । पैसा र प्रतिष्ठाको आडमा केसीको सत्यवादी चरित्रलाई धुमिल बनाउने दिवास्वप्नमा तल्लिन एउटा झुण्ड अझै आफ्ना हनुमानहरुलाई नचाउँदै छ नांगो नाच । यी सब कुराले केसीको लडाईं रोकिन्न भन्ने थाहा हुँदाहँदैपनि यीनको विकृत चेतनाले त्यसको भेउ पाउन सेकेको छैन । 

अर्कोतर्फ राज्य सञ्चालक भनिनेहरु अझै उही सत्ता र कुर्सीको दुर्ग्न्धित कुवामा पौडिरहेका छन् । अझै उनीहरुमध्ये कतिपय त केसीका समाज बदल्ने एजेण्डाहरु सामू टिक्न नसकेर उनलाई पनि आफैजस्तो राजनीतिक आग्रहमा चल्ने तुच्छ आक्षेपमा मुछिरहेका छन् । जनमत लिएर व्यवस्थापिकासम्म आएका विधायकहरु समग्र समाज परिवर्तन गर्ने एजेण्डालाई भुलेर व्यापार गर्नमा उद्दत छन् । 

एउटा गरिब र जेहेन्दार नेपाली नागरिकले पनि चिकित्सा शिक्षा पढ्न पाउनुपर्छ भन्नु अपराध हो ? भएभरका स्वास्थ्य सेवा केन्द्रिकृत गर्ने र दुर्गमका मानिस जहिल्यै प्रसूतिकालमा रक्तश्राव हुँदा समेत उपचार अभावमा मर्नुपर्ने अवस्थालाई परिवर्तन गरौं भन्नु नाजायज हो ? नोटका आधारमा जसलाई पनि चिकित्सक बनाउँदा त्यसको दीर्घकालिन असर तीन करोड नेपालीको स्वास्थ्यमा पर्छ भन्नु फगत राजनीतिक नारा मात्र हो ? संवैधानिक निकायले आफ्नो अधिकार क्षेत्रभन्दा बाहिर गएर स्वायत्त निकायमाथि हस्तक्षेप गर्दा थरर्र काँपेर बस्ने लाछी र नपुंसकहरुको समाजमा यति अडिग भएर सत्यको पक्षपाती हुनुलाई कुनै आग्रह र पूर्वाग्रह भनेर व्याख्या गर्न मिल्छ ? 
 
हे ! समाजका उपबुज्रुकहरु हो, तिमीहरुले यी सवालको जवाफ देऊ । नत्र नानाभाँति फलाकेर एउटा सत्यवादी योद्धाको बाटोमा भाँजो नहाल । केसी कुनै देवदूत होइनन् यिनी पनि एकदिन मरेर जान्छन् । यिनले आज कोर्दै गरेको इतिहासमा तिम्रा सन्ततिले पनि गर्व गर्नेछन् । स्वास्थ्य र शिक्षालाई तीव्र निजीकरण र मोलमोलाईमा बदलेका हे कथित शिक्षाकर्मी हो ! असमान र विभेदपूर्ण शिक्षाले समग्र समाजमा हुनेखाने र हुँदाखानेहरुबीच कति ठूलो खाडल निर्माण गरेको छ भन्ने आँकलन गरेका छौ ? यसको सामाजिक परिणति कती कहालीलाग्दो हुँदैछ भन्ने विश्लेषण गरेका छौ ? 

हो, केसीको लडाईं यिनै तमाम विकृति र असमानताको विरुद्धमा हो । एउटा निष्ठाको पहाडमाथि यति तल्लो स्तरको आरोप लगाइँरहँदा तिमीहरुको बिवेकले अलिकतिपनि संकोच मानेन ? कुर्सीको मुतेन्यानोमा हराएका राजनीतिकर्मीहरु, तिमीहरुले उठाउनुुपर्ने एजेण्डा एउटा नाथे चिकित्सकले उठाएको छ । तिमीहरुका घोषणापत्रमा कहिल्यै नअटाएका विषयमा एउटा मामुली डाक्टर एक्लै लडार्ईं लडिरहेको छ । दिनदहाडै मान्छे मार्दै हिंड्ने हिंस्रक गुण्डाहरु मारिँदा संसदमा ताण्डव मच्चाउने तथाकथित सांसदहरुलाई गोविन्द केसीको निष्ठाा र सत्यको रापले अलिकतिपनि पोलेको छैन ? 

हो, आज हरेक चेतनशिल नागरिकका मश्तिष्कमा यस्तै प्रश्नहरुले डेरा जमाएको छ । त्यसैले बुलन्द हुँदैछन् गुम्सिएका आवाजहरु । विस्तारै खुलेका छन् भ्रमको ढकनीले छोपिएका बिवेकहरु । पूर्वदेखि पश्चिमसम्म भ्रमको पर्दा च्यातिँदै छ । यो युद्ध अब गोविन्द केसीको मात्र युद्ध हो भन्ने भ्रम कसैमा छ भने त्यागे हुन्छ । यो अब आमनेपालीको साझा एजेण्डा बनिसक्यो । केसी अब एक्लै छैनन् । केसीले कल्पना गरेको समाज अब सबैको साझा सपना भैसकेको छ । 

अत स् केसीको माग पूरा गर्नेतर्फ नभै कुनै भ्रमको खिचडी पकाउन तल्लिन राज्यसंयन्त्रका ठेकेदारहरु होस गर केसी अब एक्लै छैनन् । अब जनजन केसी बनेका छन् मनमन केसी बनेका छन् । सत्य अब शिखर उक्लैंद छ ।  
 

Hamro Doctor