गर्भावस्थामा कोरोना संक्रमण हुँदैमा आत्तिनु हुँदैन, यस्तो छ डा. सुजिता श्रेष्ठको सुझाव
हेरौं भिडियोसहित
कोरोना भाइरस नयाँ भाइरस भएका कारणले यसको हालसम्म कुनैपनि ठोस उपचार पत्ता लाग्न सकेको छैन भने औषधि वा खोप पनि बनिसकेको छैन । हालसम्म कोरोना भाइरसको अवस्थालाई हेर्ने हो भने कतिपय मानिसहरुमा कोरोनाको लक्षण नै नदेखिएपनि निको भएका छन् भने कतिपय मानिसहरु सामान्य उपचारपछि पनि निको भएका छन् । केहि मानिसहरुलाई मात्रै सघन उपचार कक्षमा राखेर उपचार गर्नु पर्ने अवस्था आएको छ भने केहीलाई भेन्टिलेटरको आवश्यकता परेको छ ।
कोरोनाका कारण सबै उमेर समूह र अवस्थाका मानिसहरु संक्रमित भइसकेको अवस्थामा गर्भावस्थामा रहेका महिलाहरु पनि यसको चपेटामा आइसकेका छन् । अहिलेसम्मको विश्व र नेपालको अवस्था हेर्ने हो भने गर्भावस्थामा भएका महिलाहरु बढी प्रभावित भएका छैनन् । जुन सकारात्मक पक्ष हो । तर, गर्भावस्थामा शरीरको प्रतिरोधात्मक क्षमता कमजोर हुँदा गर्भवति महिलाहरुले विशेष सावधानी अपनाउन आवश्यक छ । गर्भावस्थामा कोरोना संक्रमणबाट जोगिन स्त्री तथा प्रसुति रोग विशेषज्ञ डा. सुजिता श्रेष्ठको सुझाव यस्तो छ :
कोरोना संक्रमण हुन नदिन के गर्ने ?
- बेला बेलामा साबुन पानीले हात धुने
- हाछ्यूँ गर्दा वा खोक्दा कुहिना, टिस्यू पेपर वा रुपमालको प्रयोग गरेर मुख र नाक छोप्ने
- सकेसम्म बाहिर भिडभाडमा नजाने, जानै परे मास्कको उचित तरिकाले प्रयोग गर्ने, अन्य मानिससँग कम्तिमा ३ मिटरको दुरी कायम राख्ने
- हातलाई पटक पटक आँखा, मुख वा नाकमा नलैजाने
कोरोना संक्रमण हुँदैमा आत्तिनु पर्दैन तर, संक्रमण हुँदा यस्ता लक्षण देखिन सक्छः
- ज्वरो आउने
- खोकी लाग्ने
- श्वासप्रश्वासमा समस्या हुने
- चाँडै थकाई लाग्ने
- शरीर दुख्ने
- यस्ता लक्षण देखिएमा स्वास्थ्य संस्थामा सम्पर्क गर्ने वा चिकित्सकसँग परामर्श गर्ने
कोरोनाको संक्रमण भयो भनेर घरमै सुत्केरी गराउने भनेर सोच्नु हुँदैन । यस्तो अवस्थामा घरका सदस्यहरुले हौसला दिने र बिरामीको मनोबल उच्च बनाउने काम गर्नुपर्छ । बिरामीको मनोबल उच्च बनाउनुका साथै बिरामीलाई पोषिलो खाने कुरा खान दिने, व्यायाम गर्न दिने वा ध्यान गर्न लगाउने ।
हालसम्मको अध्ययनमा गर्भवति महिला सुत्केरी हुँदा रगतको माध्यमबाट शिशुमा कोरोना संक्रमण भएको नगन्य मात्रै घटना छन् । संक्रमित भइसकेको अवस्थामा पनि सुत्केरी महिलाले शिशुलाई दुध खुवाउन सकिन्छ । तर, संक्रमित महिलाले शिशुलाई दुध खुवाउँदा वा हेरचाह गर्दा श्वास फेर्ने क्रममा, खोक्दा वा हाछ्यूँ गर्दा शिशुमा संक्रमण हुन सक्ने सम्भावना उच्च हुने भएकाले मास्कको प्रयोग गर्नुपर्छ । साथै शिशुलाई छुनु भन्दा पहिले साबुन पानीले हात धुनु पर्छ भने स्तनलाई पनि सफा गर्नुपर्छ ।
भिडियो सहित:
