काठमाडौं, २६ जेठ । ‘बिकिनी किलरका’ नामले  कुख्यात फ्रान्सेली नागरिक चाल्र्स शोभराजको राजधानीको बाँसबारीस्थित सहिद गंगालाल हृदयरोग केन्द्रमा मुटुको भल्भ फेरिने भएको छ । 

शोभराजको स्वास्थ्य जाँचपछि  आज शल्यक्रिया गर्ने निधोमा चिकित्सक पुगेको  अस्पताल स्रोतले जनाएको छ । १४ वर्षअघि काठमाडौंस्थित एउटा क्यासिनोबाट गिरफ्तार शोभराज हत्या मूद्दामा सर्वोच्च अदालतबाट  दोषी ठहर भएपछि  जेलमा छन् । 

सुन्धारास्थित केन्द्रिय कारागारमा रहेका शोभराजलाई बुधबार स्वास्थ्य जाँचका लागि गंगालाल पठाइएको थियो । शल्यक्रियाको समयमा मात्रै गंगालाल पठाउने गरी शोभराजलाई अहिले कारागारकै अस्पताल भर्ना  गरिएको छ । जेलबाट छिट्टै छुट्ने आशा राख्दै आएका उनले केन्द्रिय अस्पतालका चिकित्सकसंग आफू छुटेपछि फ्रान्समै मुटुको शल्यक्रिया गर्ने इच्छा राखेका थिए । तर स्वास्थ्यस्थिती हेर्दा लामो प्रतिक्षा हितकर नहुने चिकित्सकले  सुझाव दिएपछि शोभराजलाई गंगालालमै शल्यक्रिया गर्ने निधो गरेको केन्द्रिय  कारागार स्रोतले जानकारी दियो । 

अक्सर हतकडीमा राखिदै आएका  खतरनाक अपराधी ७३ वर्षीय शोभराज केही दिनअघि बेहोश भई ढलेपछि उनको मुटुमा समस्या देखापरेको हो । बुधबार अस्पतालबाट फोन गरी भारतको एक सञ्चारमाध्यमलाई दिएको मार्मिक अन्तरवार्तामा  उनले यसपल्ट आफू बाँच्ने वा नबाँच्ने दुविधामा रहेको र शल्यक्रियालाई लिएर हतास बनेको बताएका छन् ।  

केन्द्रीय कारागारका मेडिकल सुपरिन्टेन्डेन्ट डा. केदारनरसिंह केसीले भने उनको अवस्था नाजुक नरहेको  तर मुटुको उपचार जरुरी भएको बताए । त्यही अवस्थालाई ध्यानमा राखेर सहिदगंगालाल हृदयरोग केन्द्रमा जाँचका  लागि पठाईएको उनले बताए । सर्वौच्चको जन्मकैद फैसलापछि आफूले सजाय भुक्तान  गरिसकेको र एक वर्षपहिला नै छुट्नुपर्ने जिकिर उनले कारागारका अधिकारीसंगै गर्दै आएको भए पनि यसबारे सरकारले निर्णय गरिसकेको छैन् ।
 

आजको अन्नपूर्णपोष्ट दैनिकबाट

Hamro Doctor