बैतडी, २१ जेठ । एपेन्डिक्सको अप्रेसन गरि सकेपछि एक महिलाको रहस्यमय ढंगले मृत्यु भएको छ ।

बैतडी पुर्चौडी नगरपालिका–८ की २४ वर्षीया निर्मला विकको जिल्ला अस्पताल बझाङमा शल्यक्रियापछिलगत्तै ज्यान गएको हो । शुक्रबार बेलुकी जिल्ला अस्पतालका डा.अनुप रेग्मीले शल्यक्रिया गरेर साधारण वार्डमा सारिएकी निर्मलाको शनिवार विहान ४ बजेतिर ज्यान गएको श्रीमान् महेश विकले बताए । निर्मलासँगै सात महिनाका दुधे छोरा पनि छन् ।

डाक्टरले कुनै वास्ता नगरेका कारण श्रीमतीको ज्यान गएको मृतक निर्मलाका श्रीमान् महेशको आरोप छ । राति ३ बजेतिर सँगै रहेको छोरालाई आमाको दुध खुवाएको र त्यतिवेला राम्रै रहेकी निर्मलाको एकाएक स्वास्थ्य अवस्था बिग्रेपछि ज्यान गएको हो । बच्चालाई आमाको दुध खुवाएपछि आफू निदाएको र बच्चा कराएपछि उठेर हेर्दा चढाएको स्लाइन सकिएको अवस्थामा बिहान ४ बजे निर्मला मृत अवस्थमा भेटिएको श्रीमान् महेशले बताए ।

शल्यक्रियामा सहभागी डा.अनुप रेग्मीले भने अप्रेसन गर्दा बिरामी निकै डराएको कारणले ज्यान गएको हुन सक्ने प्रतिक्रिया दिएका छन् ।

(आजको नयाँ पत्रिका दैनिकमा लेखेको समाचार)

Hamro Doctor