देशभर थप ७८ जनामा कोरोना सङ्क्रमण पुष्टि, सक्रिय सङ्क्रमितको सङ्ख्या ५ सय नाघ्यो
काठमाडौं, २३ असार । गत २४ घन्टामा देशभर थप ७८ जनामा कोरोनाभाइरसको सङ्क्रमण पुष्टि भएको छ ।
स्वास्थ्य तथा जनसङ्ख्या मन्त्रालयका अनुसार गत २४ घन्टामा देशभर ३ हजार ५ सय १५ कोरोना परीक्षण गरिएको छ । जसमा ७८ जनामा कोरोनाभाइरसको सङ्क्रमण पुष्टि भएको हो ।
मन्त्रालयको अद्यावधिक तथ्याङ्क अनुसार गत २४ घन्टामा देशभर १ हजार ३ सय ४ आरटी पिसिआर विधिबाट कोरोना परीक्षण गर्दा ६० जना र २ हजार १ सय ३१ एन्टिजेन विधिबाट कोरोना परीक्षण गर्दा १ जनामा सङ्क्रमण पुष्टि भएको छ ।
योसँगै नेपालमा हालसम्म आरटी पिसिआर विधिबाट ९ लाख ८० हजार ५८ र एन्टिजेन विधिबाट १ लाख ४० हजार ५ सय ७७ जनामा कोरोना सङ्क्रमण पुष्टि भइसकेको छ ।
यस्तै गत २४ घन्टामा देशभर रहेका सक्रिय सङ्क्रमितमध्ये थप २२ जना स्वस्थ भएका छन् भने मृत्यु हुनेको सङ्ख्या शून्य रहेको छ ।
हालसम्म देशभर कोरोना सङ्क्रमणमुक्त हुनेको सङ्ख्या ९ लाख ६७ हजार ५ सय ९८ पुगेको छ भने ११ हजार ९ सय ५२ जनाको मृत्यु भइसकेको छ । हाल देशभर सक्रिय सङ्क्रमितको सङ्ख्या ५ सय ८ रहेको छ ।
गत २४ घन्टामा देशभर ८८ हजार ६ सय ४४ जनाले कोरोनाविरुद्धको खोप लगाएका छन् ।
