२४ घन्टामा देशभर जम्मा ४ जनामा कोरोना सङ्क्रमण पुष्टि, मृत्यु शून्य
काठमाडौँ, २९ वैशाख । गत २४ घन्टामा देशभर जम्मा ४ जनामा कोरोना भाइरसको सङ्क्रमण पुष्टि भएको छ ।
स्वास्थ्य तथा जनसङ्ख्या मन्त्रालयका अनुसार गत २४ घन्टामा २ हजार ८ सय १७ कोरोना परीक्षण गर्दा जम्मा ४ जनामा सङ्क्रमण पुष्टि भएको हो । मन्त्रालयको अद्यावधिक तथ्याङ्क अनुसार गत २४ घन्टामा आरटी पिसिआर विधिबाट २ हजार ४ सय ६३ कोरोना परीक्षण गर्दा ४ र ३ सय ५४ एन्टिजेन विधिबाट परीक्षण गर्दा शून्यमा सङ्क्रमण पुष्टि भएको छ ।
योसँगै नेपालमा हालसम्म आरटी पिसिआर विधिबाट ९ लाख ७८ हजार ९ सय ८२ र एन्टिजेन विधिबाट १ लाख ४० हजार २ सय ७ जनामा सङ्क्रमण पुष्टि भएको छ ।
यस्तै गत २४ घन्टामा देशभर रहेका सक्रिय सङ्क्रमितमध्ये १८ जना स्वस्थ भएका छन् । २४ घन्टामा मृत्यु हुनेको सङ्ख्या शून्य नै रहेको छ ।
हालसम्म नेपालमा कोरोनाका कारण ११ हजार ९ सय ५२ जनाको मृत्यु भएको छ भने ९ लाख ६६ हजार ८ सय ५७ जना स्वस्थ भएका छन् ।
हाल देशभर १ सय ७३ जना मात्रै सक्रिय सङ्क्रमित रहेका छन् ।
