निर्वाचनमा मतदान केन्द्रमै कोरोनाविरुद्धको खोप लगाइने, खोप लगाउन छुटेकाले पनि लगाउन सक्ने
काठमाडौँ, २२ वैशाख । सरकारले वैशाख ३० गते हुने स्थानीय तहको निर्वाचनमा खोप नलगाएकै कारण मतदान गर्नबाट बञ्चिन नहुने बताएको छ ।
स्वास्थ्य तथा जनसङ्ख्या मन्त्रालयले खोप नलगाएकै कारण मतदान गर्नबाट बञ्चित नगरिने प्रष्ट पारेको छ ।
मन्त्रालयका सह प्रवक्ता डा.समिर कुमार अधिकारीले कोरोनाविरुद्धको खोप कोरोना भाइरसको सङ्क्रमणबाट जोगाउनका लागि भएकाले खोप लगाएको राम्रो र नलगाएको भए लगाउनुपर्ने बताए । तर, खोप कार्ड देखाएर मात्रै भोट खसाल्न पाउने व्यवस्था हालसम्म लागू नभएको पनि उनले प्रष्ट पारे ।
डा.अधिकारीले मतदाता नामावलीमा नाम भएका तर, कोरोनाविरुद्धको खोप नलगाएकै कारण कसैलाई पनि मतदान गर्ने अधिकारबाट बञ्चित नगरिने पनि बताए । साथै मतदान गर्न जाँदा खोप कार्ड अनिवार्य नरहने पनि उनले प्रष्ट पारे ।
यसैबीच, मन्त्रालयले स्थानीय तहको निर्वाचनको दिन मतदान स्थलमै कोरोनाविरुद्धको खोप लगाउने तयारी गरिरहेको छ ।
मन्त्रालयले मतदान केन्द्र नजिक नै खोप केन्द्र स्थापना गरी कोरोना भाइरसविरुद्धको खोप लगाउने भएको हो ।
स्वास्थ्य सेवा विभाग परिवार कल्याण महाशाखा अन्तर्गतको खोप शाखाका अनुसार वैशाख ३० गते मतदान केन्द्रनजिक खोप केन्द्र स्थापना गरी खोप लगाउन छुटेकालाई कोरोनाविरुद्धको खोप लगाउने गरी तयारी भइरहेको छ ।
मतदान गरिसकेपछि १८ वर्षभन्दा माथिका पहिलो, दोस्रो र बुस्टर मात्रा लगाउन सकिने छ । यस्तै खोप लगाउन छुटेका र बुस्टर डोज लगाउन बाँकी रहेकालाई मतदान गर्न जाँदा खोप कार्ड लिएर जानसमेत अनुरोध गरिएको छ ।
कोरोना महामारीको जोखिम कायमै रहेको हुँदा जनस्वास्थ्यका मापदण्ड कडाईका साथ पालना गर्नुपर्ने पनि मन्त्रालयले आग्रह गरेको छ ।
