वैशाख ९ गतेदेखि नेपाल फर्मा एक्स्पो हुने
काठमाडौं, २० फागुन । आगामी वैशाख ९ गतेदेखि ११ गतेसम्म नेपाल फर्मा एक्स्पो हुने भएको छ ।
नेपाल औषधी उत्पादन संघले शुक्रबार पत्रकार सम्मेलन गर्दै यो वर्षको नेपाल फर्मा एक्स्पो चितवनमा हुन लागेको जनाएको हो ।
कार्यक्रममा बोल्दै नेपाल औषधी उत्पादक संघका अध्यक्ष प्रज्वल सिंह पाण्डेले यो वर्षको एक्स्पोमा औषधी उत्पादनमा प्रयोग हुने नयाँ नयाँ प्रविधिहरूलाई प्रस्तुत गर्ने बताए ।
उनले भने, "केही समय अघिसम्म नेपालमा औषधी उत्पादन पनि हुन्छ र भन्ने सोचलाई परिवर्तन गर्न सक्नु हाम्रो ठूलो उपलब्धि हो । हामी गुणस्तर औषधी उत्पादनको साथसाथै नेपालको कुना कुनामा औषधी पुर्याउने अभियानमा छौं ।"
संघका अनुसार एक्स्पोमा १६० स्टलहरू रहनेछन । त्यस्तै औषधी क्षेत्रमा नयाँ प्रविधिको खोज गरिरहेको विभिन्न १२० वटा बहुराष्ट्रिय कम्पनी र ४० वटा नेपाली औषधि उधोगहरूले एक्स्पोमा भाग लिँदै छन् ।
