नेपालमा हालसम्मकै धेरैमा कोरोना सङ्क्रमण पुष्टि, सक्रिय सङ्क्रमितको सङ्ख्या ५७ हजार नाघ्यो
काठमाडौं, ६ माघ । नेपालमा हालसम्मकै धेरै मानिसमा कोरोना भाइरसको सङ्क्रमण पुष्टि भएको छ ।
स्वास्थ्य तथा जनसङ्ख्या मन्त्रालयका अनुसार गत २४ घन्टामा देशभर १२ हजार ३ सय ३८ जनामा कोरोना भाइरसको सङ्क्रमण पुष्टि भएको हो ।
मन्त्रालयले सार्वजनिक गरेको अद्यावधिक तथ्याङ्क अनुसार गत २४ घन्टामा देशभर २७ हजार ४ सय ९७ कोरोना परीक्षण गरिएको छ । जसमा २१ हजार ७ आरटी पिसिआर विधिबाट गरिएको परीक्षणमा १० हजार ५२ र ६ हजार ४ सय ९० एन्टिजेन परीक्षण गर्दा २ हजार २ सय ८६ जनामा कोरोना सङ्क्रमण पुष्टि भएको हो ।
योसँगै नेपालमा हालसम्म कोरोनाका कारण सङ्क्रमित हुनेको सङ्ख्या ९ लाख ९५ हजार ८ सय ८८ पुगेको छ ।
यस्तै गत २४ घन्टामा देशभर थप ४ जनाको कोरोनाका कारण मृत्यु भएको छ भने ६ सय ४९ जना स्वस्थ भएका छन् । हालसम्म नेपालमा कोरोनाका कारण ११ हजार ६ सय ३२ जनाको मृत्यु भएको छ भने ८ लाख १८ हजार ८ सय ९ जना स्वस्थ भएका छन् ।
नेपालमा कोरोना सङ्क्रमणको दर बढेसँगै सक्रिय सङ्क्रमितको सङ्ख्या पनि ५० हजार नाघेको छ । मन्त्रालयका अनुसार हाल देशभर सङ्क्रमितको सङ्ख्या ५७ हजार ३ सय २८ रहेको छ ।
