काठमाडौंमा सोमबारदेखि मात्र कोरोनाविरुद्व खोपको बुस्टर डोज लगाइने
काठमाडौं,२ माघ । काठमाडौंमा सोमबारदेखि कोरोनाविरुद्व खोपको बुस्टर डोज लगाइने भएको छ ।
स्वास्थ्य तथा जनसंख्या मन्त्रालयले आइतबार देखि फ्रन्टलाइनमा काम गर्नेलाई कोरोनाविरुद्धको बुस्टर डोज दिने निर्णय गरेपनि काठमाडौंमा भने सोमबारदेखि मात्र लगाइने भएको छ ।
जिल्ला जनस्वास्थ्य कार्यालय काठमाडौंका प्रमुख शम्भु काफ्लेका अनुसार सरकारले आइतबारदेखि बुस्टर डोज लगाउन निर्देशन दिएपनि आवश्यक व्यवस्थापन हुन नसक्दा सोमबारदेखि मात्र खोप लगाइने भएको हो ।
उनले भने,'सबै खोप केन्द्रहरुलाई आज परिपत्र गरिसकेका छौँ सोमबारदेखि नियमित खोप सञ्चालन भइरहेकै ठाँउबाट खोप दिन्छौ,'।
काठमाडौंका १३ अस्पताल र ४ नाकाबाट बुस्टर डोज दिइनेछ। अवश्यकता परे खोप खोप केन्द्र बढाउने काफ्लेको भनाइ छ ।
बुस्टर डोज लगाउन पहिले लगाएको खोप कार्ड अनिवार्य लिएर जानुपर्ने छ। सरकारले स्वास्थ्यकर्मी, कर्मचारी, सुरक्षाकर्मी, सञ्चारकर्मी, सार्वजनिक फोहोर संकलक, सरसफाइकर्मी, एम्बुलेन्स तथा शववाहन चालकलाई बुस्टर डोज दिने तयारी गरेको छ।
