फाइजर खोप लगाउन आवश्यक पर्ने सिरिन्ज नेपालमा कहिले ल्याइँदै छ ?
काठमाडौं,१५ पुस । बालबालिकालाई लगाइने फाइजर खोप सिरिन्ज अभावले रोकिएको छ ।
१२ देखि १७ वर्ष उमेर समूहका बालबालिकालाई खोप लगाउन सूरु गरिएको भएपनि सिरिन्ज अभाव भएपछि खोप अभियान नै स्थगित भएको थियो।
मंगलबारदेखि काठमाडौंसहित ८ जिल्लामा फाइजर खोप लगाउने कार्यतालिका बनाइएको भएपनि सिरिन्ज नहुँदा कार्यक्रम स्थगन भएको थियो।
स्वास्थ्य सेवा विभाग अन्तर्गतको व्यवस्थापन महाशाखाका निर्देशक डा.रुद्र मरासिनीका अनुसार फाइजर खोपका लागि आवश्यक पर्ने सिरिन्ज ६ लाख ६४ हजार ५ सय ६० मात्रा आगामी मंगलबारसम्ममा आइपुग्ने भएको छ।
कोभ्याक्स मार्फत शुन्य दशमलब ३ एमएलको ६ लाख ६४ हजार ५ सय ६० सिरिन्ज आगामी मंगलबारसम्ममा नेपाल ल्याउन लागेको उनले बताए ।
कोभ्याक्स मार्फत गत शुक्रबार नेपालमा ६ लाख ६४ हजार ५ सय ६० डोज फाइजर खोप आएको थियो । त्यतिबेला नै घोलक र सिरिन्ज नआएका कारण कार्यक्रम केही दिन ढिला हुन पुगेको उनले बताए ।
अबको एकसातामा सिरिन्ज आएपछि बालबालिकाका लागि खोप अभियान पुनस् सुरु हुने डा.मरासिनीको भनाइ छ।
उनले ५ देखि ११ वर्ष उमेर समूहका बालबालिकालाई खोप लगाउन थप खोप तथा सिरिन्ज आयत गर्न प्रक्रिया पनि अगाडि बढाइसकेको बताए ।
