बैतडीको भुमेश्वर माविकी दोस्रो छात्रामा कोरोना,थप ३ दिन विद्यालय बन्द
बैतडी,२१ मंसिर । बैतडीको भुमेश्वर माध्यमिक विद्यालयकी थप एक छात्रामा कोरोना भाइरसको संक्रमण देखिएको छ ।
पाटन नगरपालिका ४ स्थित भुमेश्वर मावि ठाँडको कक्षा १० मा अध्ययनरत एक छात्रामा कोरोना देखिएपछि थप ३ दिनका लागि विद्यालय बन्द गरिएको हो ।
यसअघि सोही विद्यालयमा अध्यनरत एक छात्रामा संक्रमण फेला परेपछि मंसिर १९ गतेदेखि ३ दिनका लागि विद्यालयमा विदा दिइएको थियो । तर फेरि एक छात्रामा कोरोना फेला परेपछि मंसिर २४ गते सम्मका लागि विद्यालय बन्द गरिएको विद्यालयकी शिक्षिका सुशीला भण्डारीले बताइन् ।
संक्रमित विद्यार्थीको सम्पर्कमा रहेका विद्यार्थी र शिक्षकहरुको कन्ट्याक्ट ट्रेसिङ गरी कोरोना परीक्षण गर्नुपर्ने भएकाले थप तीन दिन विद्यालय बन्द गरिएको उनले बताइन्। बैतडीमा अहिले ४ जना सक्रिय संक्रमित रहेका छन् ।
