ओमिक्रोन भेरियन्ट : नेपालमा उच्च सतर्कताको खाँचो
काठमाडौं, २१ मंसिर । दक्षिण अफ्रिका भएर फैलिएको कोरोना भाइरसको नयाँ भेरियन्ट ओमिक्रोन नेपालमा पनि देखिएको छ ।
स्वास्थ्य मन्त्रालयले सोमबार पत्रकार सम्मेलन गरी दिएको जानकारी अनुसार विदेशबाट आएको एक नागरिकबाट नयाँ भेरियन्ट भित्रिएको हो । ती विदेशी नागरिकको सम्पर्कमा रहेका अर्का नेपाली नागरिकलाई पनि संक्रमण देखिएको छ ।
दक्षिण अफ्रिकामा पहिलो पटक पुष्टि भएको नयाँ भेरियन्टको संक्रमण छिमेकी भारतमा शुक्रबार देखिएको थियो । समाचार एजेन्सीहरुका अनुसार भारतमा नयाँ भेरियन्टको भाइरस सोमबार चार गुणाले बढेको छ । तेस्रो मुलुकबाट आएका नागरिकसँगै नयाँ भेरियन्टको संक्रमण देखिएकाले नेपालमा उच्च सतर्कताको खाँचो देखिएको छ । सरकारले दक्षिण अफ्रिका सहित ९ देशबाट नेपाल प्रवेशमा रोक लगाइसकेको छ ।
अफ्रिकी मुलुकहरुबाट प्रवेश रोक लगाए पनि नेपालमा संक्रमण देखिएकाले थप परीक्षणको आवश्यकता समेत बढेको छ । स्वास्थ्य मन्त्रालयका अनुसार, ती संकास्पद व्यक्तिको सम्पर्कमा रहेका ६६ जनामा परीक्षण गरिएको छ । त्यसमध्ये दुई जनामा ओमिक्रोनको संक्रमण देखिएको हो ।
संक्रमण पुष्टि भइसकेकाले थप परीक्षण बढाउनुसँगै सरकारले सतर्कताका अन्य विकल्प रोज्न ढिलाइ गर्न हुन्न । विशेषगरी दक्षिण छिमेक भारतमा संक्रमण दर बढी भएकाले स्थलगत सीमामा समेत आवश्यक प्रबन्ध गर्न जरुरी छ ।
खुला सिमाना रहेको र आवात–जावात समेत बढी हुने भएकाले आवश्यक व्यवस्था गर्न ढिलाइ गर्न हुन्न । पहिलो र दोस्रो लहरको संक्रमणबाट पाठ सिकेर पनि सरकार र सरोकारवालाहरुको ध्यान यसतर्फ जान जरुरी छ । पहिलो लहरको संक्रमणमा सरकारले आवश्यक सतर्कता अपनाउन भन्दा पनि बढी त्रसित बातावरण थियो ।
त्यसैले संक्रमण रोक्न अपनाइएको देशब्यापी लकडाउनले रोकथाम प्रभावकारी हुन सकेन भने मुलुकले आर्थिक तथा मानवीय क्षति बेहोर्नु पर्यो । दोस्रो लहरको संक्रमणबाट नागरिकको जीवन रक्षा गर्न पर्याप्त समय सरकारसँग थियो ।
तर संक्रमणको खतरा नटरेको र खोपको विकास भइनसकेको अवस्थामा सरकारले रोकथामको आवश्यक प्रबन्ध गर्न सकेन । बरु राजनीतिक अस्थिरतका कारणले कोरोना संक्रमणलाई थप बढाउने कार्यमा दलहरु सक्रिय बने ।
अहिले पनि दलहरुले एकअर्काबीच शक्ति प्रदर्शन सहित महाधिवेशनमा व्यस्त छन् । दलहरुको राजनीतिक जीवनमा यस्ता गतिविधि स्वभाविक हुन्, तर त्यो भन्दा पनि नागरिकको जीवनरक्षालाई प्राथमिकतामा राख्न आवश्यक छ ।
