नेपालमा कोरोनाको सक्रिय संक्रमितको दर स्थिर, थपिए ४ सय १२ नयाँ संक्रमित
काठमाडौं, ४ मंसिर । नेपालमा कोरोना संक्रमणका कारण थप १ जनाको मृत्यु भएको छ ।
स्वास्थ्य तथा जनसंख्या मन्त्रालयका अनुसार गत २४ घन्टामा देशभर रहेका संक्रमितमध्ये थप १ जनाको कोरोनाका कारण मृत्यु भएको हो । योसँगै नेपालमा कोरोनाका कारा मृत्यु हुनेको संख्या ११ हजार ४ सय ८३ पुगेको छ ।
यस्तै गत २४ घन्टामा देशभर थप ४ सय १२ जनामा संक्रमण पुष्टि भएको छ ।
मन्त्रालयको अद्यावधिक तथ्यांक अनुसार गत २४ घन्टामा ११ हजार ९ सय ९३ कोरोना परीक्षण गरिएको छ । जसमा १० हजार १ सय ६ आरटी पिसिआर विधिबाट गरिएको परीक्षणमा ३ सय ६३ जना र १ हजार ८ सय ८७ एन्टीजेन विधिबाट गरिएको परीक्षणमा ४९ जनामा कोरोना पोजेटिभ देखिएको हो ।
योसँगै नेपालमा हालसम्म आरटी पिसिआर विधिबाट ८ लाख १८ हजार ३५ र एन्टीजेन विधिबाट ९५ हजार २ सय २३ जनामा कोरोना संक्रमण पुष्टि भइसकेको छ ।
गत २४ घन्टामा देशभर रहेका सक्रिय संक्रमितमध्ये थप २ सय २ जना स्वस्थ भएका छन् । योसँगै नेपालमा कोरोनाका कारण संक्रमित भएकामध्ये निको हुनेको संख्या ७ लाख ९८ हजार ९ सय १६ पुगेको छ ।
हाल देशभर सक्रिय संक्रमितको संख्या ७ हजार ६ सय ३६ रहेको छ ।
