हृदयघातबाट दक्षिण भारतीय अभिनेता पुनित राजकुमारको निधन
काठमाडौं,१२ कात्तिक । दक्षिण भारतीय अभिनेता पुनित राजकुमारको हृदयघातबाट निधन भएको छ।
शुक्रबार बंगलरुस्थित ब्रिकम अस्पतालमा हृदयघातबाट उनको निधन भएको भारतीय सञ्चारमाध्यमले बताएका छन् ।
बिहान ११ः३० मा छातीमा समस्या भएपछि अस्पताल पुर्याइएका उनको आइसियुमा उपचाररत हुँदा मृत्यु भएको अस्पताल प्रशासनले बताएको छ ।
दक्षिण भारतका सफल अभिनेता राजकुमारका छोरा पुनितको ४६ वर्षको उमेरमा निधन भएको हो ।
उनी सफल कलाकार राजकुमारका छोरा हुन् । उनले २९ भन्दा बढी कन्नड चलचित्रमा काम गरेका छन् । पुनीतले आफ्नो करिअरको सुरुवात बाल–कलाकारको रुपमा गरेका थिए । उनले राष्ट्रिय अवार्ड समेत पाइसकेका छन् ।
पुनीतको जन्म सन् १९७५ मार्च १७ मा भएको हो । भारतको चेन्नईमा जन्मिएका पुनीतको कन्नड चलचित्रमा राम्रो क्रेज थियो । उनले ‘अप्पु, अभी, भिरा कन्नडिगा, आकाश, अजय, अर्सु, मिलाना, भाम्सी, राम, ज्याकी, हुडगुरु’ लगायतका चलचित्रमा अभिनय गरेका थिए ।
