हालसम्म ९६ प्रकारका औषधि बाहेक अन्यको मूल्य निर्धारण गरिएको छैन : विभाग
काठमाडौं, १२ असोज । सरकारले हालसम्म ९६ प्रकारका औषधि बाहेक अन्यको मूल्य निर्धारण नगरेको औषधि व्यवस्था विभागले जनाएको छ ।
विभिन्न सञ्चार माध्यममा औषधिको मूल्य निर्धारण सम्बन्धी गलत र भ्रामक समाचार आएको भन्दै विभागले प्रेस विज्ञप्ति जारी गरी हाल कुनै पनि औषधिहरुको मूल्य निर्धारण नगरेको जनाएको हो ।
विज्ञप्तिमा हालसम्म विभिन्न ९६ प्रकारका औषधिहरुको २०७२ साल साउन १८ मा नेपाल राजपत्रमा प्रकाशित गरी तथा २१ प्रकारका औषधिहरुको प्रक्रिया पुरा गरी मूल्य निर्धारण गरिएको उल्लेख गरिएको छ ।
सरकारले मूल्य निर्धारण गरेका बाहेक अन्य औषधिहरुको मूल्य स्वयं उत्पादकहरुले नै निर्धारण गर्ने गरेको र त्यस्ता औषधिहरुको सिफारिस तथा प्रमाणपत्रहरुको नवीकरण गर्दा अधिकतम खुद्रा मूल्य वृद्धि भएको अवस्थामा साबिकको अधिकतम खुद्रा मूल्यमा १० प्रतिशतभन्दा बढी नबढ्ने गरी नियन्त्रण गर्ने प्रक्रिया अवलम्बन गरिएको विभागले जनाएको छ।
