गुल्मी, ८ असोज ।  गुल्मीको  मालिका गाउँपालिका  जिल्लाकै पहिलो पूर्ण संस्थागत प्रसुती गाउँपालिका घोषणा गरिएको  छ ।

बिहीबार एक  कार्यक्रमका बीच गाउँपालिकाले  जिल्ला समन्वय समिति गुल्मीका प्रमुख  लक्ष्मण पराजुलीद्वारा पूर्ण संस्थागत गाउँपालिका घोषणा  गराएको  हो ।

२०७५  साल देखि गाउँपालिका भित्र रहेका सुत्केरीको घरमा हरियो झण्डा, हातहातमा  अण्डा कार्यक्रम लागू गरिएको र स्वास्थ्यकर्मीलाइ तालिमका साथै थप प्रोत्साहनका कार्यक्रम गर्दै अहिले  आएर पूर्ण  संस्थागत प्रसुती गाउँपालिका  घोषणा गर्न  सफल  भएको स्वास्थ्य शाखा प्रमुख वसन्त भुसालले बताए ।

गर्भवती महिलाहरुलाई घरबाट स्वास्थ्य संस्थासम्म र स्वास्थ्य संस्थाबाट घरसम्म जानका लागी  ८  वटै  वडामा  निःशुल्क एम्बुलेन्सको व्यवस्था समेत  गरिएको भुसालले जानकारी दिए ।

घरमै सुत्केरी गराउदा जोखिम रहने भएको र  विगतमा  कयौं महिलाको  ज्यान समेत  गएकोले  अब  त्यस्तो अवस्था अन्त्य भएको गाउँपालिका उपाध्यक्ष देवा अर्याल रिजालले बताइन् । सदरमुकाम तम्घासबाट ४० किमि दुरिमा रहेको मालिका गाउँपालिका उत्तर बागलुङको सिमानामा छ ।

बागलुङसँग जोडिएको साविक दर्लीङ गाविस हाल वडा नं २ को स्वास्थ्य चौकिमा गत दुई दशकदेखि अहेव रहँदै आएका ओम बहादुर भण्डारी मगरले भने, ‘दर्लिङका महिलालाई प्रस्तुती सेवा दिलाउनको लागि साढे २ घण्टा हिँडेर मलाई लिन आउथे । म त्या पुग्दा ५ घण्टा लाग्थ्यो । म पुग्दा ती महिलाको मृत्यु भइसकेको हुन्थ्यो ।’

भण्डारीले गला अवरुद्ध पार्दै स्मरण गर्दै भने, ‘एक चाटु दर्लिङ देखि आजसम्म स्टचरमा बोकेर महिलालाई हिँडायौँ । गाडिमा  चडायौँ तर उनको तम्घास नपुर्‍याउँदै छल्दमा मृत्यु भयो । अब ती दिन र अहिले आकाश पाताको फरक  भएको छ  ।  मालिका गाउँपालिकालाई धन्यवाद दिन्छु ।’

वडा नं. ६ का अध्यक्ष एवं गाउँपालिका सामाजिक विकास समिति संयोजक शोभाकर गिरीले दुर्गम  गापा भएकाले पालिकाबासिलाई सहज स्वास्थ्य सेवा भएको बताए । 

वडा नम्बर  ७ का वडाध्यक्ष बेदप्रसाद  पन्थीले  जनचेतना  अभावमा अझैँ  पनि   काम  गर्दागर्दै  सुत्केरी  भइन्छ भन्ने  मानसिकता  चुनौतीको  विषय  रहेको  बताए  ।   

प्रमुख  प्रशासकीय अधिकृत  दिपक  भण्डारीले  जिरो होम  डेलिभरी  सेवा  दिनका  लागि  ९  जना  स्वास्थ्यकर्मी पालिकाले  तलब  खुवाउने  गरी  नियुक्ति गरेको  र  ७१ जना  स्वास्थ्य स्वयंसेवीहरुलाई  केन्द्र  सरकारले  दिने   भत्ताको  शतप्रतिशत  भत्ता  पालिकाले  नै  उपलब्ध गराउने  गरेको  बताए  ।  

जिल्ला  समन्वय प्रमुख  लक्ष्मण पराजुली   र  इस्मा  गाउँपालिका  प्रमुख  लक्ष्मण बिष्टले  जेरो  होम  डेलिभरी  गाउँपालिका  घोषणा गर्ने  पहिलो  बनेको  मालिका  गाउँपालिकालाई  बधाइ  दिए ।   पालिका  प्रमुख  रित  बहादुर  थापाले   पालिकाबासीलाई  स्वास्थ्य सेवामा सहज  पहुँच  पुर्‍याउने  गरी  पालिकाले  काम  गरिरहेको  दावी  गरे  ।

Hamro Doctor