चितवन, ५ भदौ । स्वास्थ्य राज्यमन्त्री उमेश श्रेष्ठले चितवनमै राष्ट्रिय क्यान्सर रोग अध्ययन संस्थान स्थापना गर्न आफू प्रतिवद्ध रहेको बताएका छन् ।

काँग्रेस चितवनले आज (शनिबार) गृह जिल्लामा गरेको बधाई तथा सम्मान कार्यक्रममा बोल्दै मन्त्री श्रेष्ठले चितवनमै सुविधा सम्पन्न क्यान्सर अस्पताल रहेकाले चितवनमै क्यान्सर रोग अध्ययन संस्थान स्थापना गर्नुपर्ने बताए । ‘मैले सुन्दै छु भक्तपुरमा संस्थान राख्न खोजिएको छ, तर चितवन क्यान्सरका लागि सुविधानसम्पन्न ठाउँ भएकाले यहाँ नै राख्नुपर्छ’–राज्य मन्त्री श्रेष्ठले भने ।

यस्तै मन्त्री श्रेष्ठले सरकारी स्वास्थ्य संस्थाहरुको सुधारका लागि सरकारले दरबन्दीलगायतको व्यवस्थापनमा ध्यान दिएको बताए । सरकारी स्वास्थ्य संस्थाहरु व्यवस्थित नभएसम्म निजी संस्थाहरु हाबी हुने भन्दै सरकारी संस्था नै बलियो बनाउनुपर्नेमा मन्त्री श्रेष्ठको जोड थियो ।

मन्त्री श्रेष्ठले स्वास्थ्य क्षेत्र राज्यको दायित्व नै रहेको भन्दै आमजनतालाई सहज स्वास्थ्य सेवा प्रदान गर्न सरकार लागि परेको बताए । उनले पछिल्लो समय कोभिड–१९ नै सरकारको चुनौति र अवसरको रुपमा रहेको भन्दै यसलाई व्यवस्थापनका लागि सरकार लागि परेको बताए । उनले खोप बिना आर्थिक अवस्था चलायमान बनाउन नसक्ने भएकाले सबै नागरिकलाई खोप अनिवार्य गरिने बताए । उनले काँग्रेस नेतृत्वको सरकार गठन भएदेखि नै एक करोड डोज खोप आइसकेको भन्दै असोज मसान्तसम्म थप एक करोड ५ लाख डोज खोप ल्याउने दावी गरे । उनले कोरोनालाई नियन्त्रण गर्ने मुख्य आधार नै खोप रहेको भन्दै संक्रमणदर वृद्धि भइरहेको ठाउँहरुमा फ्रन्टलाइनरहरुलाई खोप लगाउन थालिएको बताए । सरकारी स्वास्थ्य संस्थाहरुको सुधार सरकारको प्रमुख प्राथमिकता रहेको बताएका छन् ।

कार्यक्रममा कांग्रेस चितवनका सभापति जितनारायण श्रेष्ठलगायतले मन्त्री श्रेष्ठलाई दोसल्ला र खादा ओढाएर सम्मान गरेका थिए । उनले सो क्रममा चितवनले पुनः मन्त्री पाएको खुशी व्यक्त गर्दै राष्ट्रिय राजनीतिमा चितवन शसक्त भएर उभिने बताए । जिल्ला सचिव उत्तम जोशीले संचालन गरेको कार्यक्रममा उपसभापति कैलाश कोइरालाले स्वागत मन्तव्य व्यक्त गरेका थिए ।

Hamro Doctor