साउन २५ गतेबाट जेष्ठ नागरिकलाई कोभिशिल्डको दोस्रो डोज दिइने
काठमाडौं,२२ साउन । सरकारले साउन २५ गतेदेखि जेष्ठ नागरिकलाई कोभिशिल्डको दोस्रो डोज दिइने भएको छ ।
कोभिड १९ विरुद्धको दोस्रो डोज खोप लगाउन बाँकी करिब १३ लाख ३८ हजार ६५ वर्ष माथिका जेष्ठ नागरिकहरुलाई साउन २५ गतेदेखि खोप लगाउन लागिएको हो । स्वास्थ्य सेवा विभाग खोप महाशाखाका प्रमुख डा. झलक शर्मा गौतमका अनुसार बागमती, गण्डकी, लुम्बिनी, कर्णाली र सुदूरपश्चिम प्रदेशका नागरिकलाई खोप दिइदै छ ।
गौतमका अनुसार प्रदेश १ र २ मा भने सुरु हुन केही दिन ढिलो हुनेछ । ति प्रदेशहरुमा अहिले भेरोसेल खोप अभियान चलिरहेको हुनाले कोभिशिल्डको खोप अभियान ढिला भएको हो ।
फागुन तेस्रो साता ६५ वर्षमाथिका १३ लाख ३८ हजार भन्दा बढी जेष्ठ नागरिकले भारतको सेरम इन्स्टिच्यूटले विकास गरेको कोभिशिल्ड नामक खोपको पहिलो डोज लगाएका थिए ।
स्वास्थ्य तथा जनसंख्या मन्त्रालयले दोस्रो डोज १२ हप्तापछि लगाउनुपर्ने बताएपनि खरिद सम्झौता भएकोमध्ये १० लाख डोज खोप भारतले नदिएपछि उनीहरु दोस्रो डोज लगाउनबाट वञ्चित भएका थिए ।
