सरकारले खरिद गरेको कोरोनाविरुद्धको खोपको अन्तिम खेप भोलि आउने, जहाज आज बेइजिङ जादै
काठमाडौं, ९ साउन । सरकारले चीनबाट खरिद गरेको कोरोनाविरुद्धको खोपको अन्तिम खेप ल्याउन नेपाल वायु सेवा निगमको जहाज आज चीन जाँदैछ ।
सरकारले चीनबाट खरिद गरेको ४० लाख भेरोसेल खोपको मात्रा विभिन्न चरणमा ल्याउँदै आएको छ ।
निगमको जहाज आज राति ११ बजे बेइजिङ जाने र खोप लिएर भोलि ४ बजे काठमाडौँ अवतरण गर्ने निगमका महाप्रबन्धक डिमप्रकाश पौडेलले बताए ।
उनका अनुसार पछिल्लो पटक खोप ल्याउनका लागि निगमले बेइजिङमा पठाउने गरेको मध्ये यो चौथो उडान हो । योसँगै नेपालले चीनसँग सरकारीस्तरमा सहमति गरी ल्याएको ४० लाख मात्रा भेरोसेल खोप नेपाल आइपुग्नेछ ।
सरकारले प्राप्त खोपलाई अग्रभागमा खटिने कर्मचारी, ५० वर्षमाथिका नागरिक र आवश्यकताका आधारमा वितरण गर्दै आइरहेको छ ।
हालसम्म नेपालमा भेरोसेल खोपको पहिलो मात्रा १५ लाख २१ हजार ४ सय ६७ जनाले लगाइसकेका छन् भने ६ लाख ९२ हजार ९ सय ६९ जनाले दुबै मात्रा लगाइसकेका छन् ।
