ललितपुरमा २ र ३ साउनमा भेरोसेल खोपको पहिलो मात्रा दिईने
काठमाडौं, २९ असार । कोभिडविरुद्धको खोप लगाउने अभियान अन्तगर्त स्वास्थ्य कार्यालय ललितपुरले अगामी २ र ३ साउनमा भेरोसेलको पहिलो मात्रा लगाउने तयारी गरेको छ ।
जिल्लाभर एकैपटक खोप अभियान सञ्चालन गर्ने योजना अनुरुप २ र ३ साउनका लागि दिन तोकिएको स्वास्थ्य कार्यालय ललितपुरका प्रमुख डा. खगेश्वर गेलालले बताए ।
उनले भने, ‘नगरपालिका र गाँउपालिकामा खोप आजैबाट सञ्चालन गर्न पनि समस्या छैन् । तर महानगर भित्र केही वडाहरुमा अरु केही कारणले गर्दा एक दुई दिनपछि मात्रै सञ्चालन गर्नुपर्ने भयो । जिल्लाभर एकैपटक नगर्दा झनै गञ्जागोल हुने भएकोले हामीले २ र ३ साउनको दिन तोकेका हौँ ।’
उनले सो दिन ५५ देखि माथिका सबै, शिक्षक प्राध्यापक, सवारी चालक, सहचालक, वैदेशिक रोजगारमा जानेहरु जहाँ खोप अनिवार्य गरेको छ, ती समूहलाई खोप दिने योजना भएको सुनाए ।
उनले भेरोसेल लगाई सकेपछि मात्रै जोन्सन एण्ड जोन्सनको खोप दिने योजना भएको सुनाए । स्वास्थ्य कार्यालय काठमाडौँले भने आजैबाट केही ठाँउमा खोप चलाउने निर्णय गरेको छ ।
