काठमाडौं, २१ असार । नेपालमा कोरोनाका सक्रिय संक्रमितको संख्या निरन्तर ओरालो लाग्दै गएको छ ।

स्वास्थ्य तथा जनसंख्या मन्त्रालयका अनुसार हाल नेपालभर सक्रिय संक्रमितको संख्या २५ हजारमा झरेको छ । गत २४ घन्टाको तथ्यांक अनुसार हाल नेपालमा सक्रिय संक्रमितको संख्या २५ हजार ६ सय ९० रहेको छ ।

देशभर रहेका सक्रिय संक्रमितमध्ये २२ हजार ९ सय ९८ जना होम आइसोलेसनमा बसेका छन् भने २ हजार ६ सय ९२ जना संस्थागत आइसोलेसनमा भर्ना भएका छन् ।

यस्तै गत २४ घन्टामा देशभर थप २३ जनाको कोरोना संक्रमणका कारण मृत्यु भएको छ । योसँगै नेपालमा कोरोना संक्रमणका कारण मृत्यु हुनेको संख्या ९ हजार २ सय ४८ पुगेको छ ।

देशभर रहेका संक्रमितमध्ये ५ सय ७१ जना आईसीयूमा भर्ना भएका छन् भने १ सय ८० जनाको उपचार भेन्टिलेटरमा भइरहेको छ ।

Hamro Doctor