उपत्यकामा जारी निषेधाज्ञाको विषयमा छलफल गर्न प्रमुख जिल्ला अधिकारीहरुको बैठक बस्दै
काठमाडौं, १३ असार । कोरोना महामारीको जोखिमलाई ध्यानमा राखी काठमाडौं उपत्यकामा जारी निषेधाज्ञाको विषयमा प्रमुख जिल्ला अधिकारीहरुबीच छलफल हुँदैछ ।
उपत्यकाका तिन वटै जिल्लाका प्रमुख जिल्ला अधिकारीहरुबीच काठमाडौं उपत्यकामा जारी निषेधाज्ञा पुनः एकसाता थप्ने र निषेधाज्ञाको स्वरुपको बारेमा छलफल गर्न बैठक बस्न लागेको हो ।
काठमाडौंका प्रमुख जिल्ला अधिकारी कालीप्रसाद पराजुलीले सम्भवतः एक साताका लागि निषेधाज्ञा थपिने र निषेधाज्ञाको स्वरुप हालको जस्तै राख्ने बताए ।
उपत्यकामा जारी निषेधाज्ञा भोलि राति १२ बजे सकिँदै छ । अहिले समय र बार तोकेर सबै किसिमका पसलहरु खोल्न दिइएको छ ।
यसअघि मोटरसाइकल, जीप, कार, भ्यान, ट्याक्सीलगायतमा जोर–बिजोर लागु गरिएको छ । सार्वजनिक सवारी–साधन, विद्यालय, मठ–मन्दिर, पार्टी प्यालेसलगायतमा प्रतिबन्ध कायमै छ ।
कुन–कुन क्षेत्रमा खुकुलो बनाउने भन्नेबारे टुंगो लागिनसकेको सीडीओ पराजुलीले बताए ।
