कोरोनाको उपचारबापत बढी शुल्क लिने अस्पतालबारे अनुगमन गर्न वाणिज्यलाई जिम्मा
काठमाडौं, २५ जेठ । सरकारले कोरोना उपचारका लागि तोकेको शुल्कभन्दा बढी शुल्क निले अस्पताललाई कारबाही गर्ने जिम्मा उद्योग वाणिज्य तथा आपूर्ति मन्त्रालयलाई दिएको छ ।
कोरोना उपचारमा तोकिए भन्दा बढी शुल्क लिएको बारे अनुगमन गरेर कारबाही गर्न स्वास्थ्य तथा जनसंख्या मन्त्रालयले उद्योग वाणिज्य तथा आपूर्ति मन्त्रालयलाई पत्राचार गरेको हो ।
मंगलबारको मन्त्रीस्तरीय निर्णयबाट अस्पतालहरुले कोभिड बिरामीसँग लिईरहेको उपचार शुल्कबारे अनुगमन गर्न वाणिज्यलाई आग्रह गर्ने निर्णय भएको स्वास्थ्य मन्त्रालय अन्तर्गतको स्वास्थ्य आपतकालीन कार्य सञ्चालन केन्द्रले वाणिज्यलाई पठाएको पत्रमा उल्लेख गरिएको छ ।
सामान्य अवस्थाका कोभिड बिरामीका लागि दैनिक तीन हजार पाँच सय, मध्यमका लागि सात हजार र गम्भीरका १५ हजार रुपैयाँ सरकारको तोकेको र यदी बिरामीले आफैले उपचार खर्च व्यहोर्ने हो भने तोकिएको शुल्कमा अस्पतालले अधिकतम् ५० प्रतिशत मात्रै शुल्क थप गर्न सक्ने स्वास्थ्य मन्त्रालयले जनाएको छ ।
साथै सबै सरकारी अस्पताल र स्वास्थ्य मन्त्रालयसँग सेवा सम्झौता गरी सेवा प्रदान गर्न सूची सार्वजनिक भएका अस्पतालको अनुगमन गर्न पनि स्वास्थ्य मन्त्रालयले वाणिज्यलाई भनेको छ ।
