नेपालमा कोरोना संक्रमणमुक्त हुनेको संख्या ५ लाख नाघ्यो, थपिए ५१ सय ५३ नयाँ संक्रमित
काठमाडौं, २५ जेठ । नेपालमा कोरोना संक्रमणमुक्त हुनेको संख्या ५ लाख नाघेको छ ।
गत २४ घन्टामा देशभर रहेका संक्रमितमध्ये थप ६ हजार ५ सय ७० जना कोरोना संक्रमणमुक्त भएका छन् । योसँगै नेपालमा कोरोना संक्रमणमुक्त हुनेको संख्या ५ लाख ४ हजार ५ सय ३० पुगेको छ । यो दर कुल संक्रमितको ८४ दशमलव ७ प्रतिशत हो ।
स्वास्थ्य तथा जनसंख्या मन्त्रालयका अनुसार गत २४ घन्टामा देशभर भने ५ हजार १ सय ५३ नयाँ संक्रमित थपिएका छन् ।
गत २४ घन्टामा देशभर १७ हजार ६ सय ७६ कोरोना परीक्षण गरिएको छ । जसमा १२ हजार ६५ आरटी पिसिआर विधिबाट कोरोना परीक्षण गर्दा ३ हजार ८ सय ७० जना र ५ हजार ६ सय ११ एन्टीजेन परीक्षण गर्दा १ हजार २ सय ८३ जनाका कोरोना पुष्टि भएको छ । देशभर थपिएका नयाँ संक्रमितसँगै नेपालमा कोरोनाका कारण संक्रमित हुनेको संख्या ६ लाख ११ हजार ३ सय ८ पुगेको छ ।
