सरकारद्वारा चिनियाँ खोप ‘कोरोनाभ्याक’ लाई आपतकालीन प्रयोगका लागि अनुमति
काठमाडौं, २२ जेठ । सरकारले चिनियाँ ‘कोरोनाभ्याक’ लाई आपतकालीन प्रयोगका लागि अनुमति दिएको छ ।
चिनियाँ कम्पनी सिनोभ्याक लाइफ साइन्सले विकास गरेको कोभिड १९ विरुद्धको खोपलाई नेपालमा प्रयोग गर्न अनुमति दिएको छ ।
स्वास्थ्य तथा जनसंख्या मन्त्रालय र औषधि व्यवस्था विभागको शुक्रवार बसेको बैठकले अनुमति प्रदान गरेको हो ।
विभागका सूचना अधिकारी सन्तोष केसीले अनुमति पाएको कोरोनाभ्याक खोप १८ वर्ष माथिका व्यक्तिले लगाउन सकिने बताए ।
उनले चिनियाँ कम्पनी सिनोभ्याकले उत्पादन गरेको यो खोप आयात अनुमतिका लागि बायोमेटिक्स प्रालिले विभागमा निवदेन दिएको पनि जानकारी दिए । उनले बायोमेटिक्सले आयातका लागि निवेदन दिएपनि अनुमति पाइनसकेको र प्रक्रियामै रहेको पनि बताए ।
गत मंगलबार मात्रै यो खोपलाई विश्व स्वास्थ्य संगठन डब्ल्यूएचओले आपतकालीन प्रयोगका लागि अनुमति दिएको थियो ।
