कोरोनाविरुद्धको खोप खरिदका लागि सरकारको प्राथमिकतामा विश्वका ४ मुलुक
चीन र अमेरिकासँग १ करोड खोप खरिद गर्ने तयारी
काठमाडौं, १४ जेठ । सरकारले कोरोनाविरुद्धको खोपका लागि विश्वका ४ मुलुकसँगको पहलमाथि जोड दिएको छ ।
स्वास्थ्य पत्रकार मञ्च नेपालद्वारा कोभिड १९ विरुद्धको खोप आयातमा भइरहेको कुटनीतिक प्रक्रियाका लागि भइरहेको पहल विषयक अन्तरक्रिया कार्यक्रममा बोल्दै परराष्ट्र मन्त्री प्रदीप ज्ञवालीले विश्वका ४ खोप निर्माता कम्पनिसँग कुराकानी भइरहेको बताए ।
उनले चीनको सिनोफार्म, रुसको स्पुतनिक, अमेरिकाको जोन्सन एण्ड जोन्सन र अमेरिकाको एस्ट्राजेनेकासँग खोपका लागि पहल भइरहेको बताए ।
मन्त्री ज्ञवालीले सिनोफार्मबाट ५० लाख र जोन्सन एण्ड जोन्सनबाट ५० लाख खोपका लागि पहल भइरहेको पनि जानकारी गराए ।
उनले खोप खरिद प्रक्रियासम्बन्धी कानूनी प्रावधानले समस्या भएको हुँदा अबको १० देखि १५ दिनभित्र यो विषयमा निस्कर्स निस्कने र खोप खरिद प्रक्रिया सहज हुने हुँदा खोप खरिदमा सहज हुने विश्वास व्यक्त गरे ।
उनले सरकारले खोप खरिदका लागि ३६ अर्बको स्रोत सुनिश्चित गरिसकेको हुँदा त्यसै अनुसारको काम भइरहेको पनि बताए ।
खोपको आपूर्ति, माग लगायतका विषयमा तालमेल नमिल्दा पनि केही समस्या देखिएको र खोपको असमान वितरणका कारण पनि खोपको आपूर्तिमा समस्या भएको उनको भनाइ छ ।
नेपाली जनतालाई खोप लगाउने र जीवन रक्षा गर्ने सरकारको प्राथमिकता रहेकाले सरकारले खोप निर्माता मुलुक र कम्पनीहरुसँग निरन्तर छलफल भइरहेको पनि मन्त्री ज्ञवालीले बताए ।
मन्त्री ज्ञवालीले पर्सी तीब्बतबाट २ लाखा डोज र २ जुनमा थप ८ लाख डोज नेपाल सरकारले भित्र्याउन लागेको पनि जानकारी गराए ।
