नेपालमा कोरोना संक्रमणमुक्त हुनेको संख्या ४ लाख नाघ्यो, ५ लाख २८ हजारभन्दा बढी संक्रमित
काठमाडौं, ११ जेठ । नेपालमा कोरोना संक्रमणपछि निको हुनेको संख्या ४ लाख नाघेको छ ।
स्वास्थ्य तथा जनसंख्या मन्त्रालयका अनुसार गत २४ घन्टामा देशरभ रहेका संक्रमितमध्ये ६ हजार ४ सय ४ जना स्वस्थ भएका छन् । योसँगै नेपालमा कोरोना संक्रमण पछि निको हुनेको संख्या ४ लाख ४ हजार ८ सय ८७ पुगेको छ । यो दर कुल संक्रमितको ७६ दशमलव ६ प्रतिशत हो ।
यस्तै गत २४ घन्टामा देशभर थप ८ हजार ६ सय ३६ जनामा कोरोना भाइरसको संक्रमण पुष्टि भएको छ ।
मन्त्रालयका अनुसार गत २४ घन्टामा देशभर २२ हजार ९ सय ३६ कोरोना परीक्षण गरिएको छ । जसमा २२ हजार ३ सय ६ आरटी पिसिआर विधिबाट परीक्षण गर्दा ८ हजार ३ सय ८७ र ६ सय ३० एन्टीजेन परीक्षण गर्दा २ सय ४९ जनामा कोरोना संक्रमण पुष्टि भएको छ । योसँगै नेपालमा कोरोनाका कारण संक्रमित हुनेको संख्या ५ लाख २८ हजार ८ सय ४८ पुगेको छ ।
