नेपालमा कोरोना संक्रमणमुक्त हुनेको संख्या ३ लाख नाघ्यो, संक्रमितको संख्या ४ लाख नजिक
काठमाडौं, २६ वैशाख । नेपालमा लगातार दोस्रोदिन कोरोना संक्रमणको दर ९ हजारभन्दा तल झरेको छ ।
स्वास्थ्य तथा जनसंख्या मन्त्रालयका अनुसार गत २४ घन्टामा देशभर ८ हजार ८ सय ५० जनामा कोरोना संक्रमण पुष्टि भएको छ । यसअघि, शनिवार पनि नेपालमा कोरोना संक्रमणको दर ९ हजारभन्दा तल थियो ।
मन्त्रालयका अनुसार गत २४ घन्टामा १८ हजार ७ सय ८७ आरटी पिसिआर परीक्षण गर्दा ८ हजार ७ सय ७७ जनामा कोरोना पोजटिभ देखिएको हो भने ५ सय ६ एन्टीजेन परीक्षण गर्दा ७३ जनामा कोरोना पोजेटिभ देखिएको हो । योसँगै नेपालमा कोरोना भाइरसका कारण संक्रमित हुनेको संख्या ३ लाख ९४ हजार ७ स ४० पुगेको छ ।
गत २४ घन्टामा देशभर रहेका संक्रमितमध्य ४ हजार २२ जना स्वस्थ भएका छन् । योसँगै नेपालमा कोरोना संक्रमणमुक्त हुनेको संख्या ३ लाख ३ हजार ८ सय ८७ पुगेको छ । यो दर कुल संक्रमितको ७६ दशमलव ७ प्रतिशत हो ।
