गत २४ घन्टामा ३३ सय ७० जना कोरोना संक्रमणमुक्त, थपिए ८ हजार ४ सय १८ नयाँ संक्रमित
काठमाडौं, २५ वैशाख । नेपालमा एकैदिन ३ हजारभन्दा बढी कोरोना संक्रमित स्वस्थ भएका छन् ।
स्वास्थ्य तथा जनसंख्या मन्त्रालयका अनुसार गत २४ घन्टामा देशभर रहेका संक्रमितमध्ये ३ हजार ३ सय ७० जना स्वस्थ भएका छन् ।
मन्त्रालयको अद्यावधिक विवरण अनुसार हालसम्म देशभर कोरोनाका कारण संक्रमित भएकामध्ये २ लाख ९८ हजार ७ सय ६५ जना स्वस्थ भएका छन् । यो दर कुल संक्रमितको ७७ दशमलव ४ प्रतिशत हो ।
पछिल्लो समय नेपालमा कोरोना संक्रमणमुक्त हुनेको संख्या वृद्धि हुन थालेको छ ।
यस्तै गत २४ घन्टामा थप ८ हजार ४ सय १८ जनामा कोरोना भाइरसको संक्रमण पुष्टि भएको छ ।
मन्त्रालयका अनुसार गत २४ घन्टामा देशभर १८ हजार ३ सय ४ कोरोना परीक्षण गरिएको छ । जसमा १७ हजार ३ सय १५ आरटी पिसिआर परीक्षण गर्दा ८ हजार २ सय ८७ र ९ सय ८९ एन्टीजेन परीक्षण गर्दा १ सय ३१ जनामा कोरोना पोजेटिभ देखिएको हो । योसँगै नेपालमा कोरोना भाइरसका कारण संक्रमित हुनेको संख्या ३ लाख ८५ हजार ८ सय ९० पुगेको छ ।
हाल देशभर ८३ हजार ४ सय ९३ सक्रिय संक्रमित रहेका छन् ।
