लगातार दोस्रोदिन ९ हजारभन्दा बढीमा कोरोना संक्रमण पुष्टि, २४ घन्टामा २९ सय ५ जना स्वस्थ
काठमाडौं, २४ वैशाख । नेपालमा लगातार दोस्रो दिन ९ हजारभन्दा बढीमा कोरोना भाइरसको संक्रमण पुष्टि भएको छ ।
गत २४ घन्टामा देशभर २० हजार ४ सय ८२ कोरोना परीक्षण गर्दा ९ हजार १ सय ९६ जनामा कोरोना भाइरसको संक्रमण पुष्टि भएको छ । यो संख्या एकैदिन थपिएको हालसम्मकै धेरै हो ।
स्वास्थ्य तथा जनसंख्या मन्त्रालयका अनुसार गत २४ घन्टामा देशभर १९ हजार ९ सय ८७ आरटी पिसिआर परीक्षण गर्दा ९ हजार २३ र ४ सय ७३ एन्टीजेन परीक्षण गर्दा १ सय ७३ जनामा कोरोना भाइरसको संक्रमण पुष्टि भएको छ ।
देशभर नयाँ संक्रमित थपिएसँगै कोरोना भाइरसका कारण संक्रमित हुनेको संख्या ३ लाख ७७ हजार ६ सय ३ पुगेको छ ।
यस्तै गत २४ घन्टामा देशभर रहेका संक्रमितमध्ये २ हजार ९ सय ५ जना स्वस्थ भएका छन् । योसँगै नेपालमा कोरोना संक्रमणपछि निको हुनेको संख्या २ लाख ९५ हजार ३ सय ९५ पुगेको छ । यो दर कुल संक्रमितको ७८ दशमलव २ प्रतिशत हो ।
हाल देशभर कोरोनाका ७८ हजार ६ सय २९ सक्रिय संक्रमित रहेका छन् ।
